松此放眼看世界

一個平凡而且炎熱的中午，我如常伏案工作，在寧靜的工作環境下，我的手機響起，是媽媽的來電。

我按下接聽鍵，然後俏皮地說：

「喂，老媽子，咩事呀？」

在電話的另一邊，傳來媽媽親切的呼喚：

「松呀，我煲咗湯，攞比你飲好嘛？」

「梗係好啦，有人煲埋送埋愛心靚湯，點解唔飲呀？妳去到邊呀？」

「我已經到咗你公司樓下嘞...」

「哎呀，老媽子，我咪叫咗妳差不多到就打比我嘛，咁妳就唔洗喺度熱住等我啊！」

「我唔記得咗呀...」

「唔緊要啦，我而家落嚟搵妳，妳搭扶手電梯上二樓先，嗰度有冷氣涼，唔好熱親啊~~」

「哦，好呀。」

我便立即動身往二樓找媽媽，但卻找不到；跟著我便往地下走，終於見到媽媽站在柱旁等候著我。見到媽媽後，我拍拍她膊頭，閒談兩句，便接過這壺愛心靚湯。我想陪媽媽到巴士站乘車回家，但是媽媽不容許我這樣做，硬推著我走，著我快點去吃午飯，免得我餓壞身子，我只好乖乖的聽話，步上扶手電梯。隨著扶手電梯徐徐往上爬，我一邊看著手上的這壺愛心靚湯，一邊再回頭看著媽媽漸漸走遠的身影，內心百感交集。一壺默默無言的湯，盡顯媽媽對我無微不至的關愛。但是要年老的媽媽為我專誠送湯，如此的厚愛，實在是深感不配，想著想著，不禁流下眼淚。

媽，妳離開之後，可知我有多掛念妳？每天經過妳曾等候著我的位置時，我多期望能再次見到妳。

媽，我懷念妳，妳曾拖著我的小手四處去。

媽，我懷念妳，妳我把臂同行到街市買菜。

媽，我懷念妳，妳為我結婚時所作的禱告。

媽，我懷念妳，妳對我無限的接納與支持。

媽，我實在是懷念妳...

媽，就讓我拖著妳的手，陪妳走到生命的盡頭。這一刻，我要放手了，因為天父要帶妳走更美好的路，記得好好的跟著天父，認清楚天家的路，他朝我們再見時，妳也要拖著我的手，帶我參觀這個天家啊。