松此放眼看世界

睇完菲律賓事件之後，個心好唔舒服，成棚人圍住部車10個鐘都做唔到野，最後都係流血收場，悲……

無錯，我為呢件事真係好嬲，當晚我由7點半睇到9點，睇住D所謂『特種部隊』包圍部旅遊巴，老鼠拉龜咁，菲律賓警察係咪真係咁「YAP」呀！幾10人喺度等個爛鬼鎚爆窗，菲律賓真係窮到連買多個鎚都無？危急處理竟然係用『正門出入』，真係守規舉！

好感恩，當我好燥嘅時候，為著呢件事不斷咁數菲律賓警察時，有人提醒我『火，但唔好讓它生根，“申冤在我，我必報應”呀！』，我當時「疾」咗一下，當諗深一層嘅時候，我火都o黎埋又點？用盡「一切方法」去制裁菲律賓政府同d警察又點？我哋嘅做法同個槍手又有咩分別呢？

當我想到死者嘅屋企人時，我覺得佢哋真係好難去面對之後嘅生活。就我自己而言，要接受同面對家人嘅離開係唔容易，因為我都經歷緊，但係佢哋呢？要接受由5變2，由4變2嘅突變，真係好難去面對，重整生活已經夠難，仲要比d死纏爛打嘅記者不斷追問，生活真係難上加難及困擾。

不如大家都靜落o黎，比大家有個空間，去諗下點樣面對之後嘅生活啦，唔好再問d死傷者嘅家屬『你會點樣面對之後嘅生活呀？』比著係你，你答到嗎？