「各位團友早晨，好快趣又係我哋行程嘅最後一日，今日唔會有指定行程比大家，我會先帶大家乘搭當地嘅交通工具往布拉格市中心，去到之後就會係自由活動，自費午膳，於指定時間集合，然後我哋會出機場，先去倫敦再轉機番香港。」
﹝2008年9月17日上集﹞
多謝晒多謝晒，開心嘅時間過得特別快，又係時候講bye bye，開心咗咁多日，都係時候要番香港lu~~
今朝早一起身就出咗去酒店附近行吓，清早時份天氣稍涼，不過就顯得比較舒服，可能我鐘意涼少少嘅天氣吧。
﹝酒店門口﹞
等緊團友嘅時候我又周圍去影相，點知比我見到碧咸，哈哈~~我又點會放過呢個機會吖！其實佢並唔係英國嗰個碧咸，而係我話嘅東歐碧咸，你睇下佢似唔似？
﹝東歐碧咸﹞
跟住我哋就買咗車飛去搭巴士，之後再轉地鐵去布拉格市中心，一張飛要26kc，大約$13左右，可以自由搭當地交通工具70分鐘。呢度搭車都幾得意，上車唔係比錢，而係「打咭」，好似番工咁，真搞笑。
﹝布拉格車飛﹞
﹝上車一刻﹞
﹝上車要打咭﹞
坐咗一陣間巴士之後，我哋就轉搭地鐵，不過個月台比想像中差。
﹝唔知咩站月台﹞
搭地鐵又係一個搞笑經驗，到咗站之後，無論上車定落車都好，係要按掣先會開門。如果有一次同一度門上車落車都係遊客的話，而佢哋又唔知要按掣，咁咪好大家都鬥等？先提醒各位去東歐嘅朋友，要緊記呢一點！
﹝地鐵車門及路線圖﹞
去到市中心之後就自由活動，行咗一陣間之後，就見到有個好似詢問處嘅地方，睇真d？原來係公廁o黎o架，真搞嘢@@，唔知會唔會真係有人去呢？我總係覺得呢個係整蠱人嘅廁所……
﹝布拉格街邊公廁﹞
途中，我哋都見到一d幾有特色嘅建築物，有國家博物館同埋電車cafe，係唔識得郁嘅。
﹝布拉格市中心﹞
﹝國家博物館﹞
﹝電車cafe﹞
行咗一陣之後，有人提議話不如再坐吓其他交通工具，反正都仲未過時，咁我哋就是但上咗o架電車，向右邊坐一個站，然後落車，過對面上另一架車，向左邊坐一個站，然後又落車，咁咪可以搭多2次電車，而又唔怕蕩失路lor~~哈哈~~
﹝布拉格電車﹞
之後我哋去咗行超級市場同食飯，下集再講！
留言列表
