﹝2010年11月28日﹞
國際通 > 那霸空港 > 香港
架旅遊巴都未轉到見到國際通，就已經有啲阻滯，停咗喺度行唔到；個領隊就同我哋講，原來今日國際通會劃成行人專用區，只有限定車輛能夠駛入，而我哋架旅遊巴呢，就要兜落下一條街，再轉番入去，咁我哋就可以喺條橫街度落車喎，不過依家呢……連下一條街都未去得到，就已經塞住咗喺度……冇辦法啦，唯有落車喺老遠行入國際通囉！
沿路見到果啲『限定車輛』原來都幾得意喎，有觀光的士，又有卡通巴士，不過好似收費都唔平㗎~~
﹝行人專用區 +『限定車輛』@國際通﹞
行到返國際通，第一件事就係去醫肚，哈哈……竟然係食BBQ放題！而且我哋之前見過網上都有介紹呢間燒肉店，好似評價都唔錯，我哋跟團都竟然有得嚟呢度食，所以有啲 surprise 囉！
不過呢間野超多人，我哋喺門口等咗十幾二十分鐘先有位，而且仲要食得一個鐘，不過都算啦，呢度好多嘢食，坐得都好舒服，再者，都係果句啦……我哋喺國際通有好多地方要行同好多嘢要買嘛，邊有咁多時間慢慢食吖！
﹝歡笑燒肉店﹞
呢餐我哋晏晝食咗大半個鐘就走lu，原本諗住即刻去食海塩雪糕做飯後甜品，不過好似有啲飽，所以都係行陣先……
點知出到嚟就見到一批一批小朋友喺度表演，又跳舞、又打鼓，仲有啲玩單輪車 tim~~就係因為咁，所以我哋喺度睇咗好耐『表演』，幾乎唔記得晒啲『任務』……
﹝小朋友嘅精彩表演﹞
原來除咗有小朋友表演外，仲有好多親子活動，見到啲家長同佢哋嘅仔女玩得咁投入，個個滿面笑容，慢條斯理咁hea 吓hea吓喺度玩，對比起我哋呢啲趕候趕命嘅遊客，簡直係兩種截然不同嘅感覺，究竟我哋係咪前世未辛苦過呢？真係要好好『檢討』吓先得！
﹝大人細路同樂日﹞
好嘞！返嚟我哋嘅『行程』嘞！首先要去幫我哥哥買隻 YUI最新嘅 Single，由於係 Japan Version，所以香港仲未有，好在之前問咗領隊，我哋好容易就喺 Tower Record度買到 lu~~不過唔知係因為前一晚天黑，還是今日係封咗路嘅關係，我哋雖然噚晚喺國際通 pre-visit過，但係啲地方就好似一啲都唔認得咁，好在佢只係得條直路，唔係都恐怕會蕩失！買完 CD，我哋就行去街尾搵藥房，幫朋友搵沖繩褐藻素之餘，又可以睇吓有乜新奇古怪嘅嘢買嚟做手信；點知褐藻素就買唔到，仲比我哋發現呢間藥房啲嘢貴到暈，之前喺 Jusco買咗果啲牙刷，比呢度每支平足100円，嘩！仲貴過 Jusco，佢咪好發！所以我哋都係冇幫襯就走咗 lu~~
﹝同噚晚不一樣的國際通﹞
返轉頭路經我哋喺 Day2食午餐嘅地方，順帶一提，呢度除咗平同埋快之外，原來仲係24小時營業 tim㗎~~不過如果對食肆環境同服務有要求嘅話，咁就都係去幫襯其他餐廳會好啲！
﹝自助快餐店﹞
哈哈，終於嚟到食海塩雪糕嘅時候 lu~~ 不過話就叫做海塩雪糕，其實即係普通軟雪糕，加隨便任落嘅調味塩，塩嘅味道有七、八種，我哋就梗係冇執輸咁隻隻都落吓啦，所以結果咪唔知邊隻味打邊隻味囉，不過都唔緊要啦，最重要係又有得玩，又有得食嘛！
﹝塩屋軟雪糕﹞
唔知係咪落咗塩嘅雪糕特別快溶嘅呢？個雪糕買嘅時候明明好堅固，落咗啲塩，影咗兩張相，啲雪糕就已經漏到成手都係，所以如果想影多兩張相，或者加多幾次塩，咁就買杯裝好過用 cone嘞，起碼可以玩耐啲嘛！
﹝好快溶嘅雪糕﹞
食完雪糕，我哋又要急急腳行埋餘下嘅半條國際通，其實成條國際通嘅舖頭，唔係有個好靚嘅裝飾做門口，就係放咗好多得意嘅公仔做招徠，目的都係一個，就係吸引人行入間舖頭囉，雖然我哋唔係行咗入好多間，但係就影低咗好多個門口，行吓行吓，我哋就由街尾行返去街頭 lu~~
﹝各色各樣嘅舖頭招徠技倆﹞
唔好以為條國際通好短，由街頭到街尾，大大少少，總共都有十幾廿條街，我哋由食午餐嘅燒肉店做起點，行咗去國際通嘅街尾，由街尾又行到嚟街頭，再加埋朝早喺首里城行咗一大餐，依家對腳都已經好似唔係我哋咁樣，結果無奈地都要坐一陣抖吓先……
﹝國際通街頭﹞
點解咁無奈？就係我哋原本仲計劃咗要行平和通り，去搵壺屋通同埋去第一牧志公設市場睇月光貝……依家攰成咁樣，點去喎！結果只係行返去平和通り……嘅對面Starbucks度等集合就算……
返到嚟企定定先見到條 banner，原來今日就係呢度嘅投票日，唔知之前喺美國村見到果個 kawaii姐姐支持嘅候選人選唔選到呢？不過呢度真係冇乜選舉氣氛，既冇人拉票，就連傳單都冇張，究竟堅定流㗎？
﹝投票日@平和通り﹞
我哋一邊等集合，一邊睇住啲小朋友喺度『搞破壞』，將條行車線同行人路都油到五顏六色 ~~好恐怖呀~~
唔經唔覺，啲團友都已經到齊晒lu，我哋仲諗住可以好快上返旅遊巴出機場啦，點知架旅遊巴都係駛唔到入嚟，結果又要行返去街尾上車……唉！計吓計吓，我哋原來都來回行咗整條國際通 3次……唔通真係前世未行過？？？
﹝好多『搞破壞』嘅『魔怪』呀！﹞
行程嚟到呢度，已經去到最後一個景點 --『沖繩樹屋』，其實我哋架旅遊巴之前都已經經過呢度兩次，只不過呢次係可以落車影相而已……睇真啲，呢間屋其實係間餐廳，而呢棵樹亦都唔係真嘅，估唔到餐廳嘅噱頭都可以成為旅遊景點喎，真係要比個『趣』佢！
﹝最後景點 -- 沖繩樹屋﹞
離開咗樹屋，我哋就開始向那霸空港進發 lu~~ 原本諗住去到機場仲可以用盡我哋『最後一分力』參觀吓個機場，點知領隊好似趕鴨仔咁，個 counter都未開就叫我哋快啲去排隊寄行李，好在我哋前兩日自由活動時都行過吓唧！
老公見橫掂都係得個等，而且仲有好多碎銀用剩，所以我就叫佢自己去咗附近舖頭行吓，點知比佢遇到個能操流利廣東話嘅售貨員，買咗少少嘢之餘仲扮晒熟咁問果個售貨員有冇二千円紙換，個售貨員好為難咁都換咗張比佢，雖然呢張有少少爛，但係我哋都好開心，因為呢次嚟沖繩竟然有意外收穫，就係換到兩張二千円紙……呵呵！老公返到嚟，我哋就入閘 lu，去到候機室個天都已經黑咗一截，明明嚟到機場時都仲好光喎，乜黑得咁快㗎！
﹝沖繩，有緣再見！﹞
睇吓老公上到飛機個樣幾開心，究竟點解好快就要返回殘酷嘅現實世界都會咁開心呢？唔通佢傻咗？梗係唔係啦，只係因為老公天生腳長嘅關係，好多時坐飛機都會覺得好迫，好辛苦，今回可以安排到個咁嘅位比佢坐，唔開心至奇啦！
﹝飛機上最前排嘅闊位﹞
經過兩個多鐘頭嘅機程 +個多鐘頭嘅車程，我哋終於返到嚟闊別咗4日嘅屋企，返到嚟梗係將啲手信攞出嚟晒吓冷先啦！不過好慘呀，兩支苦瓜都有唔同程度嘅焗熟咗，所以要快啲送晒比人先得，哈哈！
﹝手信大晒冷！﹞
呢次旅程咁就完結咗 lu~~真係好開心，其實每次可以同老公去旅行都係好開心嘅，只不過係今次有大半日自由活動嘅時間，可以安排吓我哋想去嘅地方『探險』，又可以嘗試吓行程失敗嘅『驚喜』，對於冇時間又懶得計劃自由行嘅我哋嚟講，真係一個唔錯嘅選擇，總之就係『正、正、正』啦！
留言列表
