今次再次踏足歐洲西部，行程極緊湊，短短13日，扣番頭尾2日搭飛機，即係用11日行咗歐洲8個國家 -- 英國、意大利、梵諦岡、瑞士、德國、荷蘭、比利時同埋法國，夠唔夠趕？睇下下圖就知我哋個行程點樣行呢個西歐。
﹝西歐8國英意梵瑞德荷比法﹞
呢個行程當中，第一日喺倫敦會有半日free time，最後2日喺巴黎，各有半日左右嘅free time。咁我哋就一如以往，唔會放過所有嘅自由活動時間，plan 倫敦就比較辛苦，因為有太多地方想去。我哋plan過去巨石陣﹝Stonehenge﹞、溫莎堡﹝Castle﹞同埋巴庫﹝Bath﹞，不過最後都係決定唔去，因為時間不足，而且車費好貴，再加上第一日到達倫敦係零晨5點，機上瞓唔夠 & 瞓唔好，精神及體力都唔足夠頂足一日嘅行程，所以，都係上google pre-visit算啦~~
﹝巨石陣，Stonehenge﹞
﹝溫莎堡，Windsor Castle﹞
﹝巴庫，Bath﹞
其實，為咗呢d唔會去嘅地方，已經用咗老婆好多晚嘅時間上網搵料砌，當我哋決定唔去呢d地方時，真係有d失落，anyway 都要比心機搵其他地方嘅料吧！最後我哋決定搵跟團會去地方資料外，再搵多一d『輕kan』d嘅地方資料就算。
喺英國，嚴格d講，係倫敦，我哋會去自然歷史博物館﹝Natural History Museum﹞，仲有千禧年嘅地標 - 倫敦眼﹝London Eye﹞。
﹝跟團會到嘅景點﹞
﹝自己去嘅地方 - 自然歷史博物館 Natural History Museum﹞
﹝自己去嘅地方 - 千禧年地標─倫敦眼 London Eye﹞
講得搵料，當然唔係淨係上網搵佢喺邊 & 有咩好睇咁簡單，上google pre-visit已經係我哋對付自由活動嘅指定動作，點樣由大英博物館﹝The British Museum﹞行去最近嘅underground站，行邊條線去到邊個站轉車，轉車之後轉去邊條線，出咗站之後又再點樣行去個景點等等……呢一part嘅任務就交比我啦！
﹝Google Pre-visit - 由大英博物館步行往Tottenham Court Road Underground Station﹞
之前有朋友去過英國，並且比咗一個好重要嘅訊息我哋，英國嘅underground係可以隨時唔開一個站，甚或成條線都唔開，情況就好似大家行完維園，銅鑼灣地鐵站唔開的話，你又可以去邊個站搭地鐵呢？下圖就係我做定嘅功課，邊個站邊條線唔開都好，我都有定一d資料喺手，至少，我可以問到人點樣行去第2個站嘛~~
﹝Underground Stations﹞
由於自由活動時間分別出現喺倫敦﹝半日﹞同埋巴黎﹝半日 + 半日﹞，所以做完倫敦嘅pre-visit就輪到巴黎嘞！
﹝羅浮宮 Louvre﹞
﹝由老佛爺 Lafayete 行去羅浮宮 Louvre﹞
呢個團都有有d搞笑嘢，我哋開唔到茶會，所以之後嗰日放工就去番旅行社攞資料啦，竟然比我哋見到帶我哋團嘅領隊，當然竟緊係要安排佢嚟招呼我哋啦，有咩唔明就一次過問晒，哈哈！！
另一個搞笑位係我哋個團只有10人，無錯，係10個團友，你一d都無睇錯，更搞笑嘅係呢10個人就係5對夫婦，5 pair 人各不相識，年紀都差唔多，所以成個團都好易安排，好好玩，之後我哋更自發性話要影團體相呢，哈哈~~
仲有，呢個13天團我哋真係好感恩，因為歐洲嘅天氣通常都係陰天、霧天甚或落雨，但我哋去嘅地方大部份時間都係藍天白雲，真係勁感恩呀！
其實呢個 trip 仲有好多事發生，呢度唔講住，係時候去片！！
Lets go to the day 1 - HK Airport > Heathrow Airport！！
PS. 最後就係我次次打blog，次次都唔記得講嘅嘢，究竟我哋『唱』咗幾多錢去玩呢？原來呢一part係好重要o架，所以，今次我一定要講比大家知道，我哋一共『唱』咗 GBP 150，同埋 EUR 1700。英磅用得唔多，只係用咗 100左右，而歐元就用咗 1000左右。點解英磅用咁少呢？係因為我哋喺香港已經訂咗 Oyster Card，即係倫敦嘅八達通，車費已經 pre-paid 咗；我哋仲上網book埋 London Eye嘅門券，即係又 pre-paid 埋，所以我哋帶去嘅英磅只係用嚟買嘢吧~~ 而歐元用得唔係太多係因為我兩公婆都唔買名牌子嘅嘢，所以全部都係用嚟買手信，同埋飲飲食食lor~~
留言列表
