松此放眼看世界

近呢2個月，身體及精神都比較疲累，全因為要工作以及要照顧外父嘅病，所以好多時都推晒所有約會，否則，老婆會更辛苦。

呢排，外父心情比較波動，可能係個病啦，其實我都幾明白佢嘅苦況，一方面有個cancer要對付，即係要整好個身體先可以同佢打過；同樣，佢又有個類風濕關節炎要對付，想醫好佢，就要壓抑個免疫系統，否則佢會周身骨痛。正正係因為呢2個病係對立嘅，我o地又可以點吖？如果想要番條命，就要接受周身骨痛，因為要保住個免疫系統先有得做化療；唔通我o地選擇唔想周身骨痛而唔要條命咩？就係咁，好多時佢都好燥，有dd唔o岩心水唔滿意嘅地方時，佢都會講一d好難聽嘅說話，我o地兩公婆只好默然忍受……

近日，佢又講o左d好難聽嘅說話，我為呢d說話好唔開心，我o地唔係唔理佢，只不過日頭要番工，我o地又做到幾多o野呢？結果食lunch嘅時候我出o左去9號碼頭邊食邊祈禱，大約12點左右，天星個鐘響起，我比呢個鐘聲叮醒o左，我應該感恩。

如果我未搵到工就面對呢件事時，個情況會變得好差；搵工人幫手時，好快就有好友refer到，而且下個月中可以上工；我o地2公婆唔識煮飯煲湯，又會有人丈義幫忙……仲有好多好多。

其實，患病係一個苦難嗎？都係嘅，不過，只要我仲有呢一口氣，我有恩典送苦難嘛，即係等於有加應子送苦茶，你話會唔苦嗎？會苦，不過，會有d甜甜o地比你，等你唔洗咁苦，感謝主