松此放眼看世界

近日，聽得多亦感受得多，好唔鐘意d人係唔係都嘈o左先，一切由主觀開始。

就好似電視所講嘅5區總辭，我覺得有d幼稚，一句『為民請命』就要迫政府交個普選時間表，比唔到嗎？我咪唔玩lor~~我自己嘅見解就係『香港仲未適合行普選』。

好簡單講句，係人都知道呢個世界係唔會有一個方法，或者一個做法係可以fit晒全世界人，每次政府有o野推出時，就會有一班人去嘈政府，話佢無照顧d弱勢社群，當然，我有時亦認同政府未係好全面咁顧及大部份人，不過，可唔可以好似高鐵事件d反對者咁呢？我band得政府個方案，我就要推返一個方案比人睇下，如果唔係，咪就係家下d政客所講嘅『為反對而反對』lor！

同樣，屋企都係一樣，其實，家務呢樣o野唔難亦唔易做，所以，我嘅睇法就係『做到咪得lor』。不過，有人唔認同，可能我無佢咁高要求啦！

今個星期個印傭o黎o左，可以幫輕我倆好多生活上嘅細節o野，至少，有個人幫我o地做晒所以家頭細務，當我o地兩個番到屋企時，唔洗再做多份『part-time』。在我而言，我覺得呢個印傭幾好，雖然佢講廣東話唔係好叻，至少我o地都可以溝通到吖，日常生活上嘅做o野方法，大家都有唔同嘅手法，咁又有乜所謂吖，做到咪得lor，最重要嘅係佢唔係搞破壞嘛！再者，真係唔鐘意佢咁做咪教佢lor，又洗咩鬧佢wor！

可能，我由出o黎做o野嘅第一日開始，我就已經唔鐘意比人鬧，所以，我每一份工都好少會鬧人，明知故犯嘅就當然唔洗手軟啦！好多o野唔o岩咪講到o岩lor，鬧佢，自己又勞氣，如果鬧完佢而佢都唔知自己錯乜的話，咁就更加勞氣，所以，我會講清楚點樣做，等佢明白我嘅意思，咁咪唔洗有咁多誤會lor~~

多d溝通係好嘅，唔好諗住講o左就ok，有時真係講o左都唔ok，未必係對方蠢，有時會係自己表達就唔好。現實中，好多時自己已經想到一個方法，以為其他人已經明白o左，所以講o野嘅時候都會assume人o地已經明o左d，而到表達時候，人o地卻係唔明，其實係邊個錯呢？

其實，溝通都係叫人明白大家嘅想法吧，何苦要鬧要針對要壓制對方呢？