松此放眼看世界

今日係2010年第一個週六崇拜，能夠為主為大家去敲響呢個鐘，我感到好有使命感。除咗敲鐘之外，數奉獻時，我有少少明白天父點睇我哋呢班仔女。

崇拜後，我哋數奉獻時，除咗錢，仲倒咗幾個貼紙出嚟，我第一個反應係『唔係呀話，貼紙都奉獻？』跟住就有個姊妹話：『呢個小朋友將佢嘅所有奉獻晒，神應該好開心bor~~』

現實中，比個貼紙教會又有乜用吖，不過當我認真諗下時，我又會認同個姊妹所講，個小朋友可能真係奉獻晒佢嘅所有，所以佢所奉獻嘅係好有價值，喺天家中，應該都比咗唔少彈藥，係一個好值得表揚嘅心志同行為。

而天父呢？我相信佢都好開心，就好似一個爸爸見到自己個仔，畫咗『我們這一家』嘅圖畫一樣，相信幅畫一d都唔靚，眼耳口鼻頭身手腳一d都唔合比例，但做爸爸嘅看在眼裡，相信佢睇重嘅唔係靚唔靚，而係佢對爸爸嘅嗰份心，個爸爸一定好開心。

同樣，當我evaluate我自己對神個心時，我又好似無乜心去預備最好嘅比神，神會悅納嗎？我相信佢會，不過，佢份開心情度應該唔會高得過小朋友嗰份心意。事奉當中﹝團契職員及崇拜司事﹞，我自問兩年間，我都算係用心去做好，所以，我相信神去睇我嘅事奉時，佢應該會笑住對我，佢會悅納我嘅付出。

喺度，我都想鼓勵所有有無事奉嘅朋友，唔好只用成績、果效同數字去衡量自己為神付出嗰份心，更加唔好去同人比較，正如經上所講，窮寡婦嘅2個銅錢一定比富翁所奉獻少，而神所睇嘅又係咪呢d咁表面嘅嘢呢？弟兄姊妹們，振作啊！用心付出，係神所悅納嘅。

當日有窮寡婦嘅2個銅錢做見證，今日有小朋友嘅幾個貼紙做見證，一齊比心機啦！