松此放眼看世界

喺公司, 我養咗一缸魚毛仔，對於我o黎講，養呢缸魚真係有d難度，因為我用慣2呎或以上嘅魚缸養魚，有晒氣泵抽水同過濾器，相比家下，只係一缸水，真係有d唔習慣，同時，亦不得不讚嘆「生命」嘅堅韌，喺無氣泵抽水同過濾器嘅情況下，生命一樣可以繼續，仲可以傳宗接代tim，勁！！

每日我番到公司，d魚一見到我就好雀躍咁不停游動，我都知你哋肚餓，等我食埋個早餐就輪到你哋啦~~

當我睇見呢缸魚時，我會覺得「世界係唔會因為你而停落o黎」係好正確。點解呢？

我缸魚係一個世界；

我張枱係一個世界；

我身處嘅部門係一個世界；

我身處嘅樓層係一個世界；

我身處嘅大廈係一個世界；

我身處嘅地區係一個世界；

我身處嘅國家係一個世界；

魚同魚之間，有佢哋嘅追逐、部門同部門之間都有大家嘅追逐、國家同國家之間亦都有大家嘅追逐，結果，有一方戰敗，勝方好開心，可能會大事宣揚，總之就有風駛盡利；敗方好唔開心，可能接受唔到呢個現實，佢可能會搵人出氣，賴呢個賴嗰個。

呢d都係人之常情，無話對與錯。無論開心也好，唔開心也好，呢個世界唔會因為呢d事會有大轉變。地球繼續以大約24小時轉一圈，紅綠燈依然按時轉訊，番工嘅番工，放假嘅放假，有邊個會咁得閒去關心你？朋友唔會24小時on call去關心你，佢哋唔會知你幾時唔開心，幾時想同人傾計，幾時想借膊頭……

好似我缸魚咁，有條細魚比條大魚追住o黎啄，唔知大魚同細魚點諗呢？好威？唔開心？對於成缸魚o黎講，只係天下間其中一件「事情」吧，問題係，發生咩問題都好，個缸都係你個世界，你走唔甩，你可以做嘅就係「振作！起身！再上路！」

身邊可以有好多人陪你走過每一段傷心路，但係「振作！起身！再上路！」呢3件事，係要靠你自己去做。

振作，精神上，唔好比自己down。

起身，肉體上，要重過正常生活。

再上路，意志上，你已經走出傷痛。

朋友們都好想見番一個正常嘅你。