哈哈好感恩,為咗清假,我哋又有機會去旅行嘞……本來打算平平地返大陸,反正有少量人仔喺戶口,去到旅行社,又比我哋問到個九百九十九蚊嘅廈門團,超平!幾乎即刻報咗名,好在我哋諗住返屋企上網搵搵資料先決定,睇吓睇吓,行程除咗去土樓係有啲興趣外,其他地方就根本一啲吸引力都冇,仲要餐餐都係食中式團餐,越諗越唔想去,結果又要去過旅行社,問吓有乜四天團喺11月25-28係成團啦﹝因為假期已經定咗﹞。
結果有『重大』發現:所有旅行社嘅沖繩團喺呢四日都話成團喎!價格由3,699-5,xxx不等,但行程大同小異;在日圓高企嘅今時今日,3,699去日本實在超『抵』!最後我哋選擇咗星辰3,999嘅豪華團;點解?一來,多300蚊住到一晚海灘酒店;二來,有張生日coupon喺11月參加星辰東南亞團,可以平200蚊……就係呢種貪小便宜嘅心態下,迷迷糊糊咁就報咗名;點解咁講?請參閱上文第一段第四句起再看一次,平平地的清假團由999-->3,999,『抵』極都係『貴』,又要去銀行買貴Yen﹝報團時匯率1:0.096﹞仲有就係,報咗名先記得我哋11月26要去睇清明上河圖,11月28又要去跑馬拉松……係咪咁啱呀!
算啦,唔報都報咗啦,咁我哋就開始做功課嘞;一方面搜集固有行程嘅資料同不容錯過嘅景點,另一方面,由於個團嘅單張上話有一日係自由活動,我哋梗係將所有想去嘅地方都放晒入果日嘅行程啦,根據巴士路線同地圖上嘅距離,將整日嘅時間fully occupied﹝圖1﹞,咁梗係『瀨嘢』啦!沖繩啲巴士疏到離奇,不定時地個半鐘至兩個鐘先有一班,有條路線仲得上行、冇下行,再者,旅行社都未confirm Day2定Day3係自由活動﹝兩日入住不同酒店,喺不同市出發﹞,點plan呀!!!
﹝圖1:Original Plan of 1-day自由活動﹞
於是我哋做咗個PlanC﹝圖2﹞,假設那霸市出發﹝比較合理﹞,將部份行程減去或改為步行前往,夾埋巴士時間表,好辛苦咁砌咗出嚟。我哋仲驚住唔識路又問唔到人,於是將要步行前往嘅地方喺Google map度pre-visit一次,同埋cap咗啲screen落嚟﹝圖3﹞,提醒自己邊度要直行、邊個路口要轉彎等等……係咪好perfect呢?結果點樣?咪又係『瀨嘢』囖!!!
﹝圖2:Revised Plan of 1-day自由活動﹞
﹝圖3:Screens captured from Google map﹞
就喺出發前一日,個領隊打電話比我哋先知道,原來係得『半日』自由活動時間㗎咋!要十二點幾先解散,仲未食飯tim,激動到幾乎想喺個電話度鬧個領隊!咁我哋點算……唯有漏夜download晒有關嘅巴士時間表,去得邊就邊啦!
差啲忘記喺交尾數時仲有件不愉快經歷,就係旅行社呢個時侯先話張生日coupon唔用得,原因就一籮籮:(1)特價團不適用,我哋同佢講報名時已經問過係適用喎;(2)要喺報名時出示先用得,我哋答佢報名時解釋咗比你同事知當時仲未收到,佢話唔緊要,仲叮囑我哋交尾數時記得碌番果張credit card先用得張coupon呀;(3)又話我報名同出發並非同一個月,所以都係『唔用得』;唔係嘛!咁都得!不如索性話:『總之依家就唔收,一係撻訂,一係交錢算吧啦!』我結果冇喺該分行交錢,第二日再去原本報名果間分行詢問,個職員話已經remark咗唔可以用coupon,我哋只可以去投訴當日幫我哋報名的職員!唉!呢個唔係錢嘅問題,係原則嘅問題,企得出嚟講嘢就係代表緊間公司,即使員工講錯嘢,公司都應該要負責,再者,當日幫我哋報名果個職員真係幫我哋喺電腦度check過先同我哋講用得㗎,除非佢固意講大話,否則我哋都唔知係邊個嘅問題,激氣!
不過都算啦,成個行程都安排得幾好,又冇迫我哋買嘢,又冇去啲乜乜消費景點,加上天氣都唔錯,只係唔知點解,好似眨吓眼就要返香港咁啫!
留言列表