﹝2010年11月25日﹞
香港 > 沖繩那霸空港 > Ashibinaa Outlet > 系滿Southern Beach Hotel & Resort
今次起行好舒服，早上十一點幾集合，可以食個早餐慢慢爬去機場都得；但係唔知點解，都係早咗去到；唔緊要啦，平日我哋都慣咗喺機場行來行去㗎啦，加上有大哥送機﹝上次去土耳其又有二哥送我哋機﹞，唔怕悶！
上到飛機原本諗住休息吓，點知起機冇耐，就要食午餐，轉頭又問飲乜；之後又要填入境紙，影咗兩張相就已經差不多要落機喇。而呢程機最特別係我哋第一次喺飛機上飲紅、白酒，都幾好飲吖！
﹝美味嘅飛機餐 x 2﹞
大約四點鐘﹝即係日本時間五點鐘﹞，我哋就到達沖繩機場﹝那霸空港﹞了。由於當時仲未日落，我哋就呢度影吓、果度影吓，搭架接駁車去到入境大堂先發現好多人排緊隊等過關，到攞完行李離開機場已經黑晒天嘞！沖繩機場雖然細，但樣樣嘢都算齊全，最犀利就係喺個得千餘尺嘅候車室，竟然有齊差不多全個沖繩嘅景點資料，租車資料等等……勁！
﹝停機坪上﹞
仲有樣嘢要一提嘅，就係喺我哋排緊隊入境時，竟然發現日本嘅入境紙唔單止有中文、英文，連韓文都有，教人點填之餘仲有放大鏡供應，前小小又有個靚女姐姐幫手檢查有冇填錯、填漏嘢，真細心！
﹝擺放入境紙嘅櫃台﹞
離開機場，好快就嚟到今日唯一嘅景點，阿里巴巴outlet﹝Ashibinaa Outlet﹞，顧名思義，就梗係嚟shopping啦；但由於呢度以名店為主，啲嘢又唔係靚，再加上落雨，所以我哋只係影咗幾張相就算；其實嚟呢度除咗係shopping外，亦要喺度醫肚，因為今日晚餐係唔包嘅！
﹝Ashibinaa Outlet嘅聖誕燈飾﹞
呢度就係我哋晚餐嘅地方，舖頭唔算多，除日本菜外，仲有韓國菜同咖哩等等……加上成個 Food Court 有90%都係團友，好似包場咁，怪怪地！
﹝Ashibinaa's Food Court﹞
我哋食乜？當然係日本菜啦！拉麵？錯，再估吓！
﹝麵丼亭﹞
登登登櫈！就係沖繩特產：吞拿魚、海葡萄、五花腩同沖繩喬麥麵，都幾好味，不過唔識點叫佢走蔥，所以『好多蔥呀！』
﹝二人份量嘅晚餐﹞
最好味係海葡萄，咸咸地，有啲似蟹子；300Yen一份，好快就賣晒 lu！
﹝海葡萄﹞
食完記得將餐具放回『返却口』喎，冇人幫你收嘢㗎！
﹝返却口﹞
食完飯都未夠鐘，我哋就係個 outlet 度四圍行，行過一間賣沖繩特產手信嘅舖頭，比隻大『獅子狗』﹝Shisa﹞吸引咗入去影相，最重要係有埋日期牌喺度；結果買咗小小手信之餘，仲幫朋友買埋隻細『獅子狗』！
﹝沖繩の石獅子﹝Shisa﹞﹞
行到集合時，已經停雨 lu，不過我哋都唔係咁鍾意名牌嘢，所以冇乜可惜！轉眼間就返到酒店嘞，今晚我哋會住 Southern Beach Hotel & Resort，呢度地下同二樓嘅 lobby 打通，由兩邊樓梯連接住﹝另一邊當然有電梯啦﹞，好新、好大，外面仲有個泳池，之後就係停車場、沙灘同埋海，係咪好正呢？據聞今年五月先開張㗎咋！
﹝酒店地下大堂﹞
派完匙咭我哋就返咗上房，發現床面有件好大嘅睡衣；原本諗住著上身影相，但著咗之後就覺得好似個『亞差』咁，都係除返出嚟攞住影好啲！
﹝超巨型睡衣﹞
放低行李，我哋就攞埋腳架，搭lift落返 lobby 周圍行，lift內嘅地毯都好新㗎。
﹝酒店lift內地毯﹞
我哋落返嚟，除咗周圍行之外，仲有個重要任務，就係搵印仔『給』！喺個 check-in desk 旁邊，有個 services counter，我哋直覺上認為呢度應該有個印，但事實上就搵唔到，只係見到兩隻海馬喺度互『啤』，我哋玩咗佢一陣就行咗入隔離嘅手信店。
﹝二樓大堂嘅海馬兄弟﹞
呢間手信店啲嘢都幾靚，不過貴咗啲；收到玻璃珠嘅朋友，你哋嘅手信就係喺呢度買嘞！除咗玻璃珠，呢度啲『獅子狗』都幾得意，不過太貴，都係影咗佢就算！
﹝酒店嘅手信店﹞
經過口個花盆，見到啲泥度插住支貌似溫度計嘅物體，上面只有 min.同 max. 兩個字，夠竟係咪嘢嚟呢？知道嘅朋友，記得話返比我哋知喎！
﹝不知名嘅嘢﹞
出咗 outdoor 就係個好靚嘅泳池，不過由於天氣開始轉涼，呢個泳池已經冇開喇；要游水，就要入室內泳池 lu~~ 根據我哋喺網上所得嘅資料，呢間酒店係有個向海嘅教堂﹝即泳池前方喺二樓伸出嚟果間﹞，雖然冇人喺度行禮，但係佢起得咁有型，唔知會唔會有人因為見到呢度而想結婚呢？
﹝泳池 + 教堂﹞
喺教堂條橋上面望返落泳池，嘩！原來好靚喎！不過呢度大風到飛起，差啲連腳架都差啲頂唔住，影咗幾張相就拿拿聲抳返入室內 lu~~
﹝教堂上看泳池﹞
知唔知點解呢個環境咁靚，都冇乜有我哋份嘅相呢？因為呢度實在太大風嘞，我哋早已經變成癲婆同癲佬喇，加埋我哋落去，咪影響咗個景 lor，哈哈 ~~
之後返房沖過靚涼就要早啲瞓 lu，因為聽日安排咗更精彩嘅行程……
留言列表
