﹝2010年11月26日﹞
系滿Southern Beach Hotel & Resort > 美美沙灘 > 比嘉酒造 > 系滿Southern Beach Hotel & Resort > 那霸市自助牛肉飯店午餐
今日係好緊張刺激嘅一日，有睇前傳嘅朋友就知道我哋今次嘅行程係有一日自由活動；唔係，係半日至真﹝諗返起都仲有啲激氣﹞！根據行程安排，今朝係應該係喺酒店享用設施，即室內泳池游水之類﹝如果自駕遊嘅團友，早就去咗攞車 lu~~﹞；不過我哋就當然唔會留喺酒店，梗係把握時間四圍行啦；去咗邊？遲少少先講，首先睇吓房間露台嘅無敵海景先啦 ~~
﹝房間露台無敵海景﹞
雖然今朝係自選 morning call，但我哋依然晨咁早就起身落去食早餐，攞住兩張早餐劵遞比待應時，佢竟然比咗個扇貝殼我哋，睇完上面啲字先知係比人用嚟霸位嘅，咁就算一個人嚟食嘢都唔怕冇位坐啦！
呢餐早餐普普通通，食物種類唔算多，但係個自選配料嘅即煎庵列就好正；配料有海苔、水雲、磨菇、芝士等，而正就正在個蛋炒得好 juicy；總之，『正』！食完早餐，我哋就要展開今日嘅行程 lu~~
﹝早餐食事中﹞
酒店樓下原來有單車租比人，咁你哋就想像到間酒店有幾『隔涉』啦，哈哈！
﹝酒店嘅租單車服務﹞
由於酒店外面個沙灘好似好靚咁，於是我哋就沿住泳池邊嘅側門走出沙灘行吓，都仲未行到出沙灘，就已經承接咗尋晚喺教堂條橋上面嘅風勢，吹到頭都暈埋……
﹝美美沙灘 1﹞
行到出沙灘，就見到有幅描繒沖繩漁民生活嘅石刻喺個地上面，咁我哋就梗係影咗佢啦；旁邊仲有個介紹水上活動嘅攤檔，不過由於天氣開始轉冷，大概已經唔開 lu~~ 其實海灘上面仲有個女仔喺度執貝殼，咁我哋又學吓佢，䏲吓有啲乜嘢好執，結果我哋都執咗兩粒珊瑚返嚟，hehe~~ 冇執輸！
﹝美美沙灘 2﹞
﹝美美沙灘 3﹞
沿住沙灘行咗出條長堤壩度，途中有個木製嘅平台可以比人行上去，都幾得意，不過就好似同周圍嘅嘢有啲格格不入咁；但係喺呢度望返酒店個景又真係好靚喎，有種好悠閒嘅感覺，唔知係咪喺香港實在太忙，所以係要去旅行，先會有呢種感受呢？
﹝美美沙灘 4﹞
﹝美美沙灘 5﹞
離開咗沙灘，我哋就向住預先安排嘅行程進發；行去邊？都係唔講住，先嚟睇吓呢個貌似大樹菠蘿嘅植物啦，不過唔好咁大力掂佢，因為佢已經好熟，附近有幾個都跌晒落地 lu~~
﹝貌似大樹菠蘿嘅植物﹞
再沿海邊行，就係塗鴉牆海岸，近岸啲水好淺，遠處啲水又好藍，外面仲有個孤苦伶仃島 tim~~ 不過行行吓，我哋發覺有啲唔對路，地圖上明明好似行兩、三條街就到嘅地方，點解仲未見影？唔通掛住影相行過咗？
﹝塗鴉牆海岸﹞
於是我哋就行返入內陸，途中見到好多工廠，有水泥廠、食品加工廠等……其中有間工廠旁邊種咗好多樹，不過啲樹好奇怪，棵棵都 bit 啲黃色泡泡出嚟，幾乎想行埋去摸吓佢，點知行到間廠嘅正面，先知呢度原來係間『尿液化淡廠』，究竟尿液同啲黃色泡泡有乜關係呢？諗起都……
﹝尿液化淡廠外怪樹﹞
再行過咗兩個街口，見到有幾個工人喺度落貨，我哋決定都係問吓路比較好啲；於是就攞住本旅遊書指吓指吓咁問個貨車司機，跟住，佢同另一個工人講咗兩句就走返上駕車度，我哋仲以為佢唔理我哋 tim，點知原來佢竟然係攞張紙出嚟，畫埋比我哋睇下個街口轉灣再轉灣就到；於是我哋就跟住佢指嘅方向行啦，不過未到街口我哋就比個靚靚公園吸引咗入去，點知一出個公園又撞返頭先果個司機，佢喺駕車度係咁嚮咹，以為我哋行錯路，雖然結果我哋真係行錯咗小小路，不過唔緊要，最後我哋都能夠到達目的地。
﹝西崎親水公園﹞
目的地係邊？就係呢度喇！『比嘉酒造』！由於琉球泡盛聞名中外，咁我哋嚟到呢個琉球王國，就梗係要試吓佢哋啲酒精含量四、五十度嘅泡盛﹝米酒﹞啦！其實係一啲都唔難入口嘅，反而買咗盒薑黃糖就真係難食到嘔，不過都冇所謂啦，都送咗比人 lu~~ 呢度除咗有播放講泡盛歷史嘅 video 睇外，仲有個工廠生產過程嘅 display，呢度啲人都好好，我哋買咗小小嘢，都送咗支酒板仔比我哋喎，呵呵 ~~
﹝比嘉酒造內﹞
離開酒造，就係要回酒店收拾行李嘅時候了，搵得咁辛苦，臨離開前，梗係要喺呢度最著名嘅泡盛『海人』banner 度影返張相啦；由於行嚟呢度嘅時間同路程，都超出我哋預算，所以，自由活動行程都未開始，我哋都已經有啲攰 lu~~
﹝比嘉酒造外﹞
我哋已經離開酒店，同系滿市講 Bye-bye lu 回望間酒店都真係幾靚，值得推介，唔知下次嚟，仲會唔會住返佢呢？
﹝系滿 Southern Beach Hotel & Resort﹞
其實系滿同那霸根本就唔係好遠，旅遊巴好似都未坐暖就到那霸市，當我哋一進入市中心，就見到街邊有人賣飯盒，大約 300円一份，你咪以為好污漕，好多白領都買㗎；據領隊所講，呢啲差不多係全日本最平嘅午餐嘞。
﹝那霸市街邊賣飯盒﹞
我哋知道咗今晚酒店位置後，就喺牧志站攞埋張全日通單軌車票解散 lu，由於仲未夠鐘 check-in，所有團友都放晒啲行李喺 lobby，展開各自嘅自由活動 lu，而我哋嘅第一個行程就係……『醫肚』；喺解散前，我哋尊登去問個領隊『走葱』嘅日文係點講同點寫，諗住今餐實唔怕佢乜鬼都加啲葱落去啲嘢食度啦，點知入到間自助牛肉飯店，同佢講『走葱』﹝當然係日文啦﹞，佢竟然唔知我哋講乜，即使比埋張紙佢睇，都仲要入去問個 senior 先知我哋想點，夠竟係句日文有問題，定日本人食嘢唔興走葱呢？
順帶一提，我哋食食吓嘢其間，見到牛肉飯店門外有個黑衣人等巴士，最有趣係佢一直『呢』喺條電線杆後面，仲跟住個影嚟行，十足十好似拍緊某某牌子防曬廣告咁，係咪真係咁怕曬呀~~
﹝自助牛肉飯店午餐1,000円有找﹞
﹝每條成功嘅電線杆後，總有個女人支持佢﹞
食完飯我哋去邊？請留意『沖繩の旅 Day 2b』啦！
留言列表
