﹝2010年11月26日﹞
知念岬 > 齋場御嶽 > 旭橋 > 那霸空港駅 > 赤嶺駅 > 牧志
經過個多鐘頭嘅車程，我哋終於嚟到知念 lu~~ 而我哋今日喺呢度嘅景點就係相中指示牌上嘅『知念岬』，同埋『齋場御嶽』。知念岬其實係個公園，上網睇過個景好靚，有塊好大嘅草坪，同埋面向好大個海洋咁啦；至於齋場御嶽，就係個文化遺產，是古時琉球王國用嚟祭天嘅地方。
未行落知念岬之前，首先過對面馬路，睇吓回程巴士幾點經過，因為走咗班車，分分鐘要等一個鐘頭以上 ~~ 好恐怖㗎！
﹝知念海洋レジャーセンター前巴士站﹞
沿住知念休閒娛樂中心向下行兩、三分鐘就見到個體育館，體育館側邊有條路，一轉彎行落樓梯一望…… 嘩！嘩！嘩！270°全海景盡入眼簾，仲有綠柔柔嘅草地、清新嘅空氣……正！
﹝知念岬公園﹞
我哋行咗兩個圈就開始日落……仲正！
雖然我哋唔知呢個公園同埋個雕塑係紀念啲乜，但係呢度嘅風景，加埋黃昏嘅感覺，好似帶我哋去咗另一個世界咁，不得不讚嘆造物主嘅作為，明白到乜嘢叫做『神看著一切所造的都甚好』！
﹝「宇宙軸より無限記憶」雕塑﹞
望真啲，其實呢個岬兩邊都係一啲淺灘，近岸嘅海面有一啲小島嶼，據聞夏天時係有好多人喺度玩水上活動；而且附近仲有間渡假酒店，面向菲律賓海，如果下次有時間可以喺度嘆個 tea，真係乜嘢煩惱都唔記得晒！
﹝知念岬外望菲律賓海﹞
回程時，行返上體育館途中，見到有班人喺度一面叫口號、一面做體操，好似喺漫畫裡面嘅情節咁……『努力！加油！』；不過我哋冇乜咁嘅閒情逸緻睇佢哋做運動，因為我哋仲要趁日落前上去參觀齋場御嶽嘛……
﹝體育館後草坪﹞
由於喺知念岬嘅時間用多咗，所以我哋要急急腳走上齋場御嶽，預返時間搭下一班巴士返市區；好在呢個地方我哋喺Google Map已經預先pre-visit咗一次，可以唔駛點睇就知道點樣行上去，臨上去前，就梗係要喺個路口景張相先啦！
﹝齋場御嶽入口﹞
差不多到停車場，見到路邊就有間 Cafe，座位面向窗外，非常寫意，我哋仲天真到諗住回程『有時間』可以嚟飲杯嘢，點知……
﹝寫意Cafe﹞
上到嚟先知原來係要比錢入場喎……比錢入場都算啦，原來係6:00鐘就閂門，5:30 last entry喎……去到啱啱5:35，咁算點呀！簡直晴天霹靂！
網上明明話『無休日』、『入場無料』㗎！點解呀！
冇辦法啦，唯有同舊『齋場御嶽』石頭影張合照算啦！影緊嘅時候，就見到有一班日本人好開心咁行番出嚟，簡直係同我哋示威呀！
由於下一班巴士要成個鐘後先到，於是我哋就諗住返番之前經過果間Cafe消磨吓時間，點知……又啱啱閂咗門！
﹝齋場御嶽『舊』石﹞
轉眼間都未出到路口就已經天黑晒，而且天氣變得又大風又凍，仲有啲肚餓 tim……好可憐呀！好在巴士站對面有間 FamilyMart，有暖氣，又有熱辣辣嘅香腸賣，唔知係咪呢度近住旅遊區嘅關係，呢間 FamilyMart勁多手信賣，我哋就係咁食吓hea吓，結果喺度用咗六千幾円，消磨咗大半個鐘，喺一個暖『粒粒』嘅環境下等巴士，呵呵~~ 不過一行出 outdoor，又即刻凍返晒，冇辦法啦，一定要早少少去巴士站等車，唔係比佢走咗，我哋又要等多個幾鐘，滯留荒山野嶺捱凍捱餓好慘㗎~~
﹝知念 FamilyMart﹞
我哋凍住咁喺巴士站等車，無無聊聊四周圍望，可能呢度好黑，所以見到個天好多星星，於是影咗佢哋相，雖然沖繩啲星星冇土耳其果啲咁多色彩，但係就成天都係，望吓行吓、企吓等吓，駕巴士始終都未到；唔知點解呢度啲巴士硬係要遲到，同個時刻表差成半個鐘先到，如果發生喺香港，而又冇合理解釋，第二日一定見報……
仲有樣瘀事想講……就係由於我哋太想快啲返市區嘅關係，離遠一見到架巴士嚟緊，就好似顛咗咁喺度『fing』手、亂跳，好似喺度求救咁，驚死個巴士站太黑，個司機睇我哋唔到……不過一上車，就知道樣衰，原來架巴士嘅頭燈係好勁㗎，老遠都照到，咁……我哋啲『求救截車』樣咪成車人都見到囉……瘀爆！
﹝齋場御嶽入口旁巴士站﹞
之前都講過啦，喺沖繩搭巴士係分區計車費嘅，我哋喺第四區上車，返到那霸就要810円，其實都幾易明。
﹝巴士車費表﹞
落車後我哋就周圍去搵嘢食，就喺巴士總站附近有條橫街，有好多間類似居酒屋嘅食肆，我哋行嚟行去都唔知幫襯邊間好，又驚住唔識叫嘢食；結果我哋本住送死嘅心態入咗去間好多日本人幫襯、好熱鬧嘅居酒屋，一入門口就有個好有禮貌嘅待應小姐同我哋講咗『一大堆嘢』，好明顯，我哋就唔知佢講乜啦，於是佢再講多咗『一堆嘢』，哈哈……喺呢度，我不得不讚吓我老公，佢竟然喺果『堆嘢』裡面，聽到『counter』呢個字，又估到佢嘅意思係得番Bar枱，所以我哋就答咗佢『OK！』……老公，好嘢！
﹝福の家居酒屋﹞
坐低咗，好快就有個人走嚟同我哋落 order，咁我哋就梗係問佢攞『English menu』啦，點知佢竟然話『No』，咁點算？又嚟一次『超級無敵估嘢食』！我哋指吓東指吓西咁 order 咗兩份定食同一杯啤酒，仲叫咗樣小食，睇睇下圖，估吓我哋叫咗啲乜？開估：係『赤身刺』，因為我哋覺得佢係刺身﹝魚生﹞，點知……
﹝『是日推介』Memu﹞
係就係刺身，不過係馬肉刺身！
一客有五片，每片1mm厚，完全冰凍，而且無味……不過啲定食就反而幾好味；仲要一提嘅就係，呢度啲待應見我冇叫飲品，竟然主動比杯水我，仲插咗支飲管落去，相信係知道女士會怕甩唇膏而提供飲管，真細心！
﹝赤身剌﹞
呢間居酒屋啲待應雖然好忙，但個個都好有禮貌，所以臨離開前都同剛才個『counter』待應姐姐影張相留念，我老公話佢個樣好似鄧上文喎……睇睇吓都有啲似。
﹝日版『鄧上文』﹞
我哋嘅行程仲未完㗎……原本我哋諗住襯有一日單軌車票就逐個車站搭去行吓，遊車河之餘又可以去多幾個景點，順便睇吓有冇印『cup』；不過可惜體力不足，行咗成日都已經好攰，結果只係去咗兩個車站就返酒店 lu~~
去咗邊兩個站？起點站就當然係旭橋啦……哈哈，唔算數；不過喺月台望返出那霸巴士總站嘅夜景，原來都幾靚喎！
﹝那霸巴士總站夜景﹞
睇吓老公喺月台等車時個樣，就知我哋有幾攰，加上個月台又冇乜特別，而且班次又疏，成十分鐘先一班車，唔攰都等到攰啦……點解沖繩好似乜都慢過人咁嘅！
﹝旭橋駅月台﹞
唔知係咪呢度啲人比較早返屋企呢，呢個時間搭車已經好少人，而且車廂都比日頭乾淨好多……
﹝單軌電車車箱﹞
除咗好多廣告外，度門仲有啲好得意嘅蟹仔貼紙，提示乘客要小心關門，下面又有圖解說明，夠竟係架電車個門好易夾親人，定係呢度啲人唔小心到成日比個車門夾到隻手呢？唔係點解要貼"N"咁多個提示叫人小心夾手喎！
﹝溫馨提示 - 『小心夾手』﹞
終於到咗我哋其中一個景點車站 - 那霸空港駅，呢個係全日本最西端嘅車站，仲連接住日本國內線航班嘅機場，再行遠啲，就係國外線機場，雖然好攰，但係點都要行過去睇睇。
﹝那霸空港駅﹞
影完呢個遊客必影嘅 background後，我哋就行咗去國內線機場，參觀之餘，仲搵吓邊度有印『cup』，因為我哋覺得離開果日未必有好多時間比我哋周圍行，點知行咗個圈，都搵唔到個印，但係就比我哋搵到個 counter夾咗啲用嚟比人『cup』印嘅紀念咭喺度，不過可惜個 counter closed咗……哈哈，我哋都係死心不息，走去問個職員有冇得『cup』印，佢竟然幫我哋走去個 counter度攞個印出嚟比我哋『cup』喎，開心死 lor~~
﹝那霸空港駅必影 Background﹞
拖住疲乏嘅腳步，我哋終於嚟到今日最後一個景點 - 赤嶺駅，呢個就係全日本最南端嘅車站，除咗要影呢個記念柱外，仲要喺車站『cup』個紀念印，但係由於實在太夜，個紀念印已經收埋咗，好在果度個職員叔叔好人，攞番出嚟比我哋『cup』，不過就冇咗個日期 lu~~
﹝赤嶺駅外紀念柱﹞
算啦！今日嘅行程總算完成，雖然仲有好多地方想去但係就唔夠時間去，不過依我哋嘅體能，都已經近乎去到極限，去唔到果啲地方，唯有下次再去啦；最後，我哋用埋剩餘果半條人命，拖住兩個大鉛球，搭最後一程單軌電車返牧志，我哋今晚住嘅酒店 - 位於國際通嘅 Station Hotel，返到酒店 Lobby，竟然剩番我哋兩件行李未攞走，即係我哋係最後返到嚟酒店嘅團友……究竟係我哋啲團友太早返，定係我哋太夜返呢？
﹝牧志駅﹞
見到老公個樣雖然仲有笑容，但係其實我哋已經攰到想死；返到上房、沖完涼，乜都冇執過就瞓咗覺；有乜嘢都係聽日先講啦！
留言列表
