2009年5月8日，我已經失業38日了，意志有點消沈，心裡有好多不滿及怨屈，我唔想再屈喺屋企，我要出去行下，一解我嘅苦悶，我要同神呻下我嘅感受。
起咗身之後見無乜嘢做，又無工見，咁就出去同太太食個lunch，之後就去中環閒逛。我原先個plan係先去中環有蓋行人天橋，一路行上去，行到邊影到邊，夠鐘就落番國金坐van仔上山頂睇日落，點知起步無耐就炒粉，相機故障﹝其實係無電！﹞再加上有一段天橋維修，所以就去到羅便臣道就轉咗去西摩道，再行去上環，無咗相機咪用電話﹝LG990﹞lor~~
當我行行下嘅時候，我見到卑利街有一棵好搞笑嘅樹，佢從牆壁生出o黎，唔知大風d會唔會斷呢？下次打完風就上o黎睇下先 ^^
﹝卑利街的樹﹞
當我沿西摩道行嘅時候，我見到一條街叫磅巷，覺得個名幾得意，咁咪影咗佢lor~~
﹝磅巷﹞
再向前行就去到堅道同西摩道交界嘅堅道花園，我見到好多外籍人士喺度同d小朋友玩，當我見到d小朋友無憂無慮咁四處走時，不禁有d酸溜溜嘅感覺，我唔想好似而家咁，帶住憂慮咁等……等……等……
之後再向前行，轉咗入醫院道，沿途都見到好多樹，d樹根同氣根都好靚，所以都影番張相先~~
﹝o係醫院道見到嘅樹﹞
沿醫院道前行就會見到一個叫香港佐治五世紀念公園，我又見到一班小學生喺度學用緊掃把腳傳波，睇見佢哋好努力咁學習時，我都好想玩埋一份，哈哈~~
香港佐治五世紀念公園都有好多好大棵嘅機，好似以下呢一棵咁，我覺得佢好有型好茂盛，唔講唔知，棵樹後面就係高街瘋人院個舊址，而家係叫做西營盤社區綜合大樓。
﹝香港佐治五世紀念公園﹞
喺佐治五世紀念公園對面就係贊育醫院同菲臘親王牙科醫院，菲臘牙科係我小學時常到嘅地方，因為細個嘅時候d牙唔係咁好，所以有人介紹我呀媽帶我o黎呢度睇牙醫，可以平d嘛。當我再走上呢個醫院時，我個心有d激動，好感受到何謂愛。
當年，一朝早﹝好似係4、5點吧﹞呀媽就剷我起身，轉幾次車去菲臘牙科，因為派籌唔多，又要排隊，所以一定要早d去到。點知一去到，我哋就已經排40幾，我同呀媽講不如走啦，反正都排唔到，其實係我自己眼訓，但係呀媽好堅持要等到派籌為止。等咗一陣之後，排得較前嘅一個婆婆向我哋招手，個婆婆話見到我哋兩母子好慘，而佢有d唔想再排，所以讓咗個位比我哋，結果，我哋由40幾就跳咗去頭嗰幾個，當時我都唔識得開心，但事後回想起就發覺何謂愛，呀媽好愛我，連一個唔識嘅婆婆都好愛我。
之後，我就沿住高街向西環方向行，一路行到去水街，食咗個下午茶之後，就去國金坐van仔上山頂。
唔知點解，每次上山頂我都鐘意坐van仔，可能可以行經多d山頂地方吧~~四圍行咗一陣之後，我就向盧吉道﹝即港島徑第一段﹞方向行，沿路可以欣賞一下夕陽西下嘅維港景色，正當我要步入盧吉道時，我就被樹梢中射出嘅耀眼陽光所吸引。
呢幅相比我嘅感覺係，神無時無刻都照住我，就算我躲去邊都好，佢都會搵方法繼續照住我，thanks God！
﹝去到邊，都有神照住﹞
當我走進盧吉道不久，我看見這個耀眼的夕陽，感覺好溫暖，係從心底裡感到嘅溫暖，正好呼應著前一幅相片，前路暗淡嗎？不用怕，太陽依然照著我嘅前路。
﹝夕陽﹞
當我見到呢個境時，我好想作番一篇文：
題目：不倦的香港人
一天即將過去，太陽伯伯倦透了，他帶著疲倦的身軀，向著西邊回家的路走，當他差不多踏進家門前，卻細心地告訴香港人：「是時候休息了，我暫把工作交給月亮公公，當我休息過後，明天我會再為大家服務的。」
看著眼前的高樓大廈，其中的人們彷彿聽不到太陽伯伯的暫別說話；而海上的大小船隻，也依舊的東奔西走，彷彿是在追趕太陽伯伯及月亮公公一樣。
最後，太陽伯伯把工作交給月亮公公，讓月亮公公繼續看顧著這些幹勁十足，永不言敗，永不言倦的香港人。
但是太陽伯伯及月亮公公的心聲又有誰聽得懂呢？
『香港人，早點休息吧，身體比一切東西都來得重要，好好的休息一下，明天一起拚吧。』
﹝作文題目：不倦的香港人﹞
下面兩張相片係利用部電話嘅function去拍一張較闊嘅相，由於機件限制，所以光暗會有d唔協調，不過最想比大家知嘅就係，太陽伯伯往西邊走時，月亮公公已經靜悄悄地在東邊出來了。
﹝太陽伯伯往西邊走﹞
﹝月亮公公在東邊出來﹞
後記：
今日，我耳朵掛著MP3，一邊聽著敬拜歌，一邊行，一邊想，回程時，心裡平安，彷彿已經將一切嘅鬱結，一五一十的全部交晒比神。
路，仍是要繼續行；
神，依然在看顧著；
我，默然的依靠你。
Amen.
留言列表
