松此放眼看世界

﹝2011年09月12日﹞

香港 > 大阪關西空港 > Rukin Outlet > 白浜梅樽溫泉

話咁快就到咗出發嘅日子lu，今次係我哋第三次喺中秋節假期去旅行，心情一樣『緊張~~ 緊張~~ 』……

一大清早約埋兩個朋友喺中環機鐵站集合一齊出機場，雖然早咗少少到，但係個領隊就已經棟咗喺度等緊﹝離遠睇，佢個樣勁似王喜~~﹞；寄完行李，我哋就去咗 Popeye 度食早餐，一面食就一面同兩個朋友講解個行程嘅安排……依家先講行程係咪好似遲咗啲呢？有睇前傳嘅朋友就應該知道我哋連既定嘅行程都係喺出發前幾日先 confirm到，何況仲要加插行程以外嘅『驚喜』呢！

都未傾完就已經夠鐘入閘 lu，照舊影咗幾張閘前照就去準備上飛機，不過有樣好有趣嘅事想講一講；今次同行嘅其中一個朋友唔知點解好經常要去厠所，食早餐要去一去，臨上機又話要去，起初以為佢對去旅行有啲緊張，所以成日都想去，但係又唔係幾好意思直接問佢，點知後來同佢傾計講起，佢竟然話係因為生得矮，可能啲腸短啲，所以會去厠所密啲喎……呢樣嘢我都係第一次聽！係咪真o架？

﹝例牌閘前照﹞

由於今次係搭CX，所以啲空中小姐大部份都熟口熟面﹝都係香港人嘛~~﹞，而且仲好有香港人本色，個個行過都快到有陣風，想叫停佢哋都幾難；不過 CX都算好窩心，份飛機餐度竟然有美心月餅，算係應吓節啦！不過早响吖，等我哋仲攞咗個東海堂紅豆月餅去賞月 tim，後來知道朋友都有帶月餅去，結果4個人 ==> 2大4小月餅……諗起都滯！

﹝窩心飛機餐 with 月餅﹞

食完嘢瞓咗一陣，話咁快就到達日本 lu~~ 你睇！藍天白雲、秋高氣爽，如此晴朗嘅日本關西，正在呼喚著我哋嘅蒞臨……哈哈！

﹝晴朗的日本關西﹞

呢個機場冇乜特別，只係喺個無人駕駛列車嘅月台度，發現咗個幕門上面有幾個噴咀，當一有列車埋站時就會自動噴冷氣，車一閂門，佢就會停。呢個設計都幾好，既可慳電，又可以防止有人喺度賴死唔走，掂！

﹝自動噴冷氣裝置@無人駕駛列車月台﹞

可能由於早排311地震嘅關係，好多香港人都仲係驚緊嚟日本，所以今次明顯比之前少好多人，連出境都唔係排咗好耐隊；不過佢哋嘅保安依然好嚴密，除咗打指模外，仲要影埋相~~ 唔緊要啦，日本啲關員都好 nice，相比起歐洲嗰啲，唔係木無表情，就係目露兇光……我哋嚟旅行唧，得罪咗佢咩！唔使咁呀嘛！

﹝對策嚴格審査實施中﹞

攞咗行李就喺離境大堂等旅遊巴，呢個時候，啲團友已經按捺不住，個個都攞住部相機左影右影，領隊見旅遊巴未到，就隨口提一提團友們：『你哋點都要袋少少円喺身喎，因為呢度唔收港紙嘅~~』﹝我哋心諗：『廢話！』﹞點知有個師奶竟然答：『我冇円喎！』嚇到個領隊周圍幫佢睇吓邊度有銀行，講多兩講，原來佢嘅意思係啲円比老公 keep晒，所以就冇囉！比佢吹漲！

﹝關西機場﹞

離開機埸，原本依照行程就應該直踩去和歌山，而尾站先會行 outlet，因為近啲出返機場嘛；點不知一上旅遊巴，領隊就話行程有變，由於去那智瀑布條路，早前打風打爛咗，去唔到，所以我哋可以晏啲先落和歌山，依家去行咗 outlet先……嘩！嘩！嘩！茶會時咪問過嗰個講解員，佢明明話行程唔受影響喎，家吓算點先~~ 仲有，行 outlet就早講吖，我哋預先喺 website度download咗 outlet啲 coupon，全部都放晒喺個喼度，依家先講，都攞唔切啦！激氣！

﹝關西機場，『五日後見啦！』﹞

條氣仲chok住chok住嘅時候就已經到咗 outlet，同日本其他 outlet一樣，呢度佔地都唔細，而且都係人影都冇幾多隻……唉，算啦！反正我哋對 shopping嘅興趣都唔大，而且『在這晴朗的天空下……』就原諒佢一次啦，費事影響未來幾日嘅心情。

﹝團體專用落客區@Rinku Premium Outlets﹞

嚟到 outlet，我哋第一時間唔係掃平貨，而係搵 food court，皆因個朋友話佢仲係好眼瞓，要飲返杯咖啡先至回到魂喎~~ 不過呢個food court啲咖啡真係超貴，與其四、五百円買杯唔知咩嘢咖啡，不如買汽水機嗰啲算啦！睇完晒呢度啲舖頭，就只有覺得啲炸物幾吸引，如果唔係喺飛機度食得咁飽，我哋都想試吓！

﹝Food Court@Rinku Premium Outlets﹞

事實上，我哋根本就冇行過個outlet，只係影咗幾張『到此一遊』照就算，而之後我哋就沿住天橋行咗出去望到海嘅地方；唔止有海，附近仲有個大摩天輪，總算係臨時加插嘅『驚喜』吧！

﹝Rinku Premium Outlets﹞

喺天橋上面，我哋已經喺度狂影相，始終對於城市人嚟講，見到空曠嘅地方已經少之又少，呢種閒息嘅感覺更加係可遇不可求！

﹝天橋上嘅美景﹞

過咗天橋就嚟到個大摩天輪坐落嘅地方，喺日本見到摩天輪，根本一啲都唔特別，因為隨處都係嘛，但係朋友第一次嚟日本，就梗係覺得好新奇啦……不過我認為佢哋最興奮嘅，都係莫過於見到旁邊間老麥，可以坐陣休息吓之餘，又可以飲到咖啡，一舉兩得！

﹝摩天輪 + 老麥 = 興奮﹞

呢個摩天輪其實係比個商場仔圍住，而個商場仔就多數都係食嘢嘅地方，仲有一間類似Jusco嘅家品店，我哋都喺嗰度買咗少少手信，係乜嘢嚟就唔講喇，不過啲嘢都算幾抵買……行返出嚟，啱啱見到有個好特別嘅搭客 - Winnie the Pooh，坐喺個摩天輪嘅車廂度，日本人都幾懂得自娛喎，即使冇人幫襯都好，個場始終唔會出現『零遊客』！

﹝Winnie the pooh@摩天輪﹞

再之後就梗係去咗老麥啦！190円一杯咖啡雖然比香港貴，但係相比起剛才四、五百円嗰啲，已經平得多喇~~ 仲有件趣事發生喺有關呢個Mc Card度，就係我哋一廂情願以為用500円就可以買到一張票值500円嘅Mc Card，去買嘢食時就可以用返嗰500円，並且仲可以攞返張咭留為紀念嘅，點知比錢時個收銀姐姐竟然沒收咗張咭，放咗入收銀機tim~~ 我哋即刻慘叫咗一聲，再比多個楚楚可憐樣佢睇，嚇到佢同我哋嘰呢咕嚕完一輪就即刻叫經理開返部收銀機，攞返張Mc Card出嚟後，就示意要剪去一邊角先可以還返比我哋，免得我哋再用多次……哈哈！日本人真係好，sorry呀姐姐，嚇親妳tim~~

﹝Mc Card機﹞

呢間老麥嘅環境都唔錯，我哋一邊炭咖啡，一邊就試吓部相機啲無聊function，下面呢張相就係用咗個單色function - 黃色，去影呢間老麥，簡單地一轉，老麥變大家樂，勁！

﹝老麥變大家樂﹞

霎吓眼就已經差不多要集合lu~~ 行返出天橋，見到個天開始日落，我哋又再無聊一番，呢期到玩剪影~~ 『你哋估吓呢個係邊個？』

﹝剪影人﹞

集合之後，我哋就會離開大阪，向和歌山白浜進發，沿途睇住太陽落山，可惜未到白浜，個天都已經黑晒lu~~

﹝日落中嘅關西﹞

今晚嘅行程就只係返酒店，食飽飽再去浸溫泉，其實都幾hea ……咁我哋去到酒店，分配咗鎖匙就上房邊hea 邊等食飯，間房冇乜特別，不過都幾大，至於個view呢？因為嚟到時個天已經黑晒，所以夜景係乜都睇唔到，想知日景係點？留意日本關西の旅Day 2啦！

講返呢間房，我哋落去食飯離開個房時，發覺門上面有個牌寫住『避難器具設置室』，嘩！心諗，呢間房應該有啲好玩嘅嘢吧，幾乎有個衝動想返入去睇吓有啲乜『避難器具』喺個房度，但係因為趕住落去食飯，所以都係返嚟先睇啦~~ ﹝食飽飯上返嚟搵咗好耐，都唔覺得有嘢多咗，都唔知堅定流……﹞

﹝避難器具設置室﹞

呢間酒店應該係一泊兩食，即係『包餐』啦！起初諗住，酒店包埋嘅團餐，都唔應該有乜嘢要求啦，點知原來啲嘢食又非常OK喎，有魚生、有湯、有自家冬菇飯……仲有專人幫手煮嘅三色拉麵tim~~﹝可能驚有啲傻人唔煮就生食啩！﹞

不過，唔鍾意食『梅』嘅朋友就要留意喇……喺和歌山呢度嘅粉紅色嗰種拉麵係好『梅』味o架，點解我話和歌山呢度嗰種呢？就因為之前喺飛機度都食過呢隻色嘅拉麵，明明係冇味嘅，但係呢度啲呢…… 一放入口就想吐返出嚟，勁『梅』！其實成個和歌山，幾乎度度都有『梅』嘢賣~~ 好驚呀！﹝唔食梅嘅人請注意！﹞

﹝美味團餐@梅罇溫泉酒店﹞

食咗一陣仲嚟多個炸蝦天婦羅tim~~ 點解食食吓先嚟？皆因領隊話佢哋要齊人先攞去炸，費事攤凍喎！﹝係咪咁細心呀！﹞不過我幾鐘意佢呢個安排，一般嘅團餐，通常都係一次過出晒所有嘢食，所以應該熱嘅嘢，唔會好熱，甚至乎係凍，而應該凍嘅嘢就唔會好凍，變咗室溫lor~~

而今次就可以食到個熱辣辣嘅天婦羅，正！

﹝熱辣辣炸蝦天婦羅﹞

食飽後，好多團友都去咗浸溫泉或者返房休息，因為領隊話呢度附近冇乜嘢行，不過我哋又點會心息吖，冇嘢行都總有條路啩！再者，我哋都食得幾飽，唔浸得溫泉住……

﹝行後感﹞附近又真係冇乜嘢睇，加上周圍都黑麻麻，行咗幾條街，都只係見到啲民居，露天停車場，同埋有一間料理店，仲要街燈都冇多支，所以行行吓都有啲驚~~ 閃！

﹝酒店附近嘅日本料理店﹞

返酒店途中望上個天，發現原來中秋節嘅月光，喺日本都係又大又圓喎！而且可能天氣好嘅關係，連月球表面啲凹凹凸凸都影到，不過啲星星就唔夠佢光，所以影唔到 lu~~

﹝中秋節嘅月光@日本﹞

上到房無聊咗一陣，換咗件浴袍就落去浸溫泉lu~~ 

基本上，呢個溫泉咩嘢都有齊，要求唔高嘅，可以乜都唔使帶；而呢度最大嘅特色，就係喺有可以見到海嘅 outdoor溫泉區，係可以邊浸邊睇海嗰種，而個溫泉桶，就係用一d之前浸過梅嘅木桶o黎做，冇錯又係『梅』呀，鐘意『突士加』？朋友話個溫泉桶d水真係有啲梅味喎！不過我個鼻唔係咁好，所以乜都聞唔到，好彩！

仲有，其實呢度睇到海嘅木桶，每邊都只係得一、兩個，如果想一邊浸、一邊睇靚景，就要早啲去喇！呀！最緊要嘅嘢未講tim，就係去大浴場時，記得做番個『有色之士』，紅色布係『女湯』，綠色布係『男湯』，入錯咗去嘅話，男嘅，就比人打到變豬頭，兼且比人話你鹹濕，女嘅……自己諗啦~~

﹝有朋友問：點解唔係喺房沖完涼先去大浴場，而係未沖涼就走落去？我就認為去到都要喺池邊沖完身先至浸o架啦，何不嗰陣時先順便沖埋涼咪仲方便，浸完又要再沖，咁一晚咪沖好多次涼！﹞

﹝齊齊浸溫泉﹞

呢次係我第二次同朋友一齊浸溫泉，話完全唔覺得尷尬就呃人嘅，不過喺我嚟講就冇咁大感覺，事關我一除咗眼鏡，5米以外嘅嘢都已經好朦查查，再加上溫泉池嘅蒸汽，如果個朋友唔係同我講嘢，我可能都未必見到佢哋~~ 浸完溫泉就梗係返房瞓啦，有乜嘢下一Part再講…