﹝2011年09月13日﹞
白浜梅樽溫泉 > 千疊敷 > 三段壁 > 橋杭岩
『餓蝦唷~~ 』，和歌山早晨！嚟得旅行，通常我哋都會比 morning call時間早一啲起身，出去附近行吓、影吓相，然後先返酒店食早餐；今次都唔例外，一起身拉開窗簾，即刻『嘩』一聲，原來外面係無敵大海景喎，唔怪之得噚晚望出去會係漆黑一遍啦~~ 成大個海就係得幾個小島同懸崖點綴吓咁，好在有個海中展望塔喺度，如果唔係仲以為流落荒島tim~~ 我哋原本都想去個塔度行吓，點知佢一來未開門，二來呢度即使係住客都要收入場費，仲要800円一個人，好似唔多值得喎，結果我哋都冇去到……不過好在冇去唧，原來晏啲行程都會帶我哋去另一個海中展望塔，如果比咗錢入去就笨喇！
﹝無敵大海景@酒店房間﹞
落到樓下，梗係要幫間酒店影返張相先啦，雖然佢殘殘哋，但係都幾有渡假 feel~~ 酒店旁邊仲有個圍咗欄嘅公園仔，同埋一間類似小食亭嘅茅屋咁啦……
﹝梅樽溫泉@白濱﹞
沿住馬路向下行，見到路邊有條樓梯，則邊有個牌寫住『御幸芝』﹝不過唔知咩意思！﹞，於是我哋就走咗上去『探險』……
唉！有啲失望，原來上面只係個有啲似郊野公園燒烤場嘅地方，不過唔係放燒烤爐，而係放咗塊好大嘅石碑喺度，我哋影咗兩張相就喺樓梯嘅另一邊行返落嚟 lu~~
﹝『御幸芝』？？？﹞
再行冇幾遠就開始聞到一陣陣硫磺味，望真啲啦……嘩！好大煙呀！好在側邊有個牌，大概都估到佢係個溫泉，如果唔係仲以為呢度火燭tim~~ 過咗呢堆煙，我哋就轉咗落去近海嘅地方，起初係一條好簡單而寧靜嘅漁村仔，得幾家人住，行過啲就有條堤壩伸延出海；喺呢度比我哋見到一幕日本卡通片常見嘅劇情…… 一個短褲+頭盔帽造型嘅小朋友﹝大雄嗰類﹞，揹住個大書包跑出門口話：『我返學嘞！』，媽媽就打開個窗，一邊揮手，一邊就大聲叫，『小心啲呀！』…… 呢對母子可能係好平常嘅一幕，但係就洋溢住愛同關懷，羨慕de si~~
﹝小漁村旁の溫泉﹞
之後我哋行咗出堤壩，呢度一邊比人泊船，另一邊就有啲好大舊嘅三角通窿石，老公一見到就話要跳出去，企喺啲岩岩蠶蠶嘅地方同個海影張相喎！﹝都唔知點解，又唔係靚，我只係覺得好危險唧！﹞
﹝岩岩蠶蠶嘅三角通窿石堤壩﹞
哈哈，沿住海邊行到最篤篤，原來就係白濱呢度頂頂大名嘅『崎之湯』，佢出名在乜我就冇硏究過，不過單係睇佢寫住『日本最古』就已經夠照啦，而且仲有個專用停車場喺度，相信呢度一定係大有名堂，如果自問去旅行可以括咗出去嘅朋友，下次不妨入去感受吓佢有幾巴閉！
而且呢度個老闆﹝我估係啩~~﹞好好人，見我哋兩個喺門口影相，雖然未開門，都比我哋行入少少去影相，日本人真係好人！！
呢個溫泉除咗個門口係用石搭成之外，裡面浸嘅地方都有好多石頭，好有特色，可惜男湯嗰面其實都幾細，不過勝在望海，女湯嗰面就唔知lu~~ 點解我哋冇入過去都咁清楚裡面嘅情況？估吓先啦，食完早餐就開估！
﹝日本最古崎の湯﹞
我哋由於行得晏咗，所以要好趕咁返酒店食早餐，食完早餐，又要怱怱忙忙咁執好行李準備上旅遊巴，就喺呢個時候，朋友叫咗我哋去佢哋間房，話有嘢睇喎，起初我哋諗住佢哋間房同我哋同一方向，景觀應該大致相同啦，點知一望之下，原來呢個房啱啱就睇到『崎之湯』男湯裡面嘅情況，用個相機zoom埋去，仲好清楚睇到裡面啲男士赤裸裸咁喺度行來行去…… 唔好話我思想保守囉，呢個溫泉，下次比埋錢我都唔會去~~
之後我哋就出發去今日行程嘅第一個景點『千疊敷』，呢度距離酒店好近，轉兩個彎就到lu~~ 不過可能時間尚早，好少遊客之餘，連手信店都未開門，於是我哋就行出去塊大岩石度睇吓風景先啦！
﹝千疊敷﹞
由於呢度面向太平洋，面積都幾大，風又幾大，所以啲岩石就被海浪侵蝕到一層一層咁，加啲幻想力，就好似一千張榻榻米疊埋咗咁樣……所以，呢度咪叫『千疊敷』囉！又或者可以叫佢做『日本東平洲』都得！
不過好在我哋嚟得早，所以都唔係好大風，領隊話如果晏晝嚟就可能連人都會吹得郁喎，可能我都幾怕行呢啲咁凹凸不平嘅地面，好似唔多安全咁，所以都係乖乖聽領隊話唔行咁出lu，不過我哋就見到好多人喺啲岩石邊度釣魚，真係見到都驚！
﹝釣友s@千疊敷岩石邊﹞
好快就『太陽出來了~~』，咁我哋又有機會低能一番，你估吓邊兩個係我哋？
﹝低能相@千疊敷﹞
由於越行就越崎嶇，所以都係返轉頭lu~~ 一來朋友又要『去厠所』，二來手信店已經開咗門，梗係要行個圈啦！
間手信店同日本其他地方都一樣，『和歌山限定』嘅特產多不勝數，其中我就對呢啲唧喞果醬最有興趣，既有特色又唔係太貴，好適合用嚟做手信，不過實在太多種味道，都未揀到邊種味好就已經話要集合lu~~ 於是影咗佢相先，下一站應該仲會有得賣嘅……唉！不過好快就有啲後悔lu，因為之後行嘅地方都冇咁多種味道……算啦，反正送比人，又唔係自己食，咩嘢味都無所謂啦，只係唔能夠同佢哋合個照唧~~
﹝和歌山特產 -- 唧唧果醬﹞
離開千疊敷，下一站就係『三段壁』，同樣係櫈都未坐暖就話到咗喇！落車後要行少少路，途經幾檔家庭式BBQ舖仔，門口放咗好多燒魷魚、燒粟米、燒螺咁，賣相非常吸引，其中有一檔仲話買燒螺，可以揀個螺殼留念tim~~ 不過領隊話要去參觀咗先，返轉頭仲有時間食喎，於是乎我哋就示意老闆娘會轉頭幫襯，佢個樣都好似好聽得明咁答咗我哋一啲『嘢』，真好！
﹝三段壁附近嘅BBQ舖仔﹞
三段壁其實係千疊敷嘅南面海岸，被太平洋嘅巨浪削成2公里長、60公尺高嘅岩壁，由於岩壁曾經受過三次不同溶岩流過再冷卻而成，所以呢度就叫做三段壁囉。我哋個團除咗嚟三段壁睇個岩壁之外，仲包埋落去睇個36米下嘅自然洞窟，就係喺下圖右邊嗰座嘢度搭電梯落去喇~~ 嘩！呢度嘅入場費原來要1,200円，都幾貴，好在團費包埋唧，不過就算團費唔包的話，我都會建議你自費落去，因為真係好值得落去睇吓，想知有咩嘢睇就跟住嚟啦……
﹝三段壁﹞
一落到嚟就覺得周圍都好濕立立，領隊話如果太大浪嘅話，呢度係會唔比人落嚟喎……都可能係嘅，因為呢度有啲洞口都幾危險，如果漲潮又大浪的話，被水扯咗出去，唔浸死都比啲石砍死，再者呢度都幾跣腳，老人家同小朋友記得要小心啲嘞！
呢個洞窟都幾大，好似話曾經用咗嚟做海軍基地，啲窿其實係戰船停泊嘅地方，一共有四個，不過我就覺得好難想像，個窿咁細，啲浪又咁大，隻船入得到嚟都睇怕撞爛晒，以前嘅人真係匪夷所思……
﹝三段壁洞窟﹞
除咗戰船停泊嘅地方外，仲有個神社同埋間類似海軍休息室嘅屋仔……總括而言，我覺得呢度最『激』嘅地方都應該係最入呢個洞窟，退潮時啲浪都足以令人濕身，如果漲潮先嚟就真係不得了！
﹝『激』浪中@三段壁洞窟﹞
由於啲浪一時大、一時好大、一時更加大，所以我哋喺呢度影咗好耐相同拍咗好多轉movie，點知到影另一邊嘅時候就知『賴』嘢！睇吓個鏡頭，完全focus唔到，只係見到啲水點，仲要係海水……要快啲離開之餘，仲要抺番個鏡頭，慘！
呢一張相有另一個重點話比大家知 -- 唔好開閃光燈影相！
﹝水點鏡頭下嘅老公﹞
出返嚟觀景台呢度，影完相記得唔好錯過手信舖門口嘅免費冬菇茶喎，呢個日本人仲識講一啲半咸淡嘅廣東話tim，有興趣可以同佢交流吓，當然啦，人哋咁好請你飲茶，你做樣都要入去間手信舖行吓嘅，正所謂：『唔買都嚟睇吓嘛！』
﹝冬菇茶與手信舖﹞
燒螺呀！燒螺呀！好祈待嘅燒螺呀！原本可以坐定慢慢食嘅燒螺，到頭來要一邊行、一邊食，唔知係咪因為咁而影響食物嘅質素呢？不過老實講，味道真係麻麻哋，而且個尾段仲有啲苦tim~~ 算啦，都係時候集合喇，已經冇時間試其他嘢lu~~
﹝BBQ舖﹞
離開咗三段壁後，我哋就告别白浜 lu~~下一站係串本，首先係去睇橋杭岩，冇错，又係自然景觀！不過呢度唔係睇懸崖而係睇海邊無緣無故凸出嚟嘅石頭，呢堆石都真係幾神奇，風化侵蝕到周圍啲嘢都冇晒，但係佢哋依然迄立不倒，此情此境，不其然令我回想起土耳其卡柏都斯亞嘅奇石林，佢哋嘅分別就在於一個面積浩大、一個地方細小，一個喺沙漠形成、一個位於海邊而已！
﹝橋杭岩@串本﹞
原本想落個石灘度行吓，但係見個地好濕，都係費事整污漕對鞋，所以冇行到；而且呢度好大風，想快啲上返旅遊巴至真……臨走時竟然真係見到個牌上面有支土耳其國旗喎，唔知同我諗嘅嘢有冇關呢？
﹝橋杭岩停車場﹞
行咗咁耐，下一站就梗係去食午餐啦，而且亦都係喺今日行程嘅另一個景點裡面食……至於即係邊度同有乜嘢睇，就等我哋食飽再講啦！
留言列表
