﹝2011年09月13日﹞
串本海中公園 > 梅干館 > 紀州南部皇都露天溫泉酒店
今日晏晝係喺串本海中公園飯堂度食火鍋，我哋食飽後就携『劵』入場參觀喇！
一入門口，就有個哥哥仔示意可以幫我哋影相，同其他樂園一樣，買佢張相就當然係要收錢嗰種啦，不過佢好好人，除咗用佢部收錢相機幫我哋影相之外，仲叫我哋放晒啲相機落個籃仔度，佢會遂架同我哋再影喎，而且仲放咗好多『海洋生物』喺度，任我哋攞去影相tim~~ ﹝老實講，佢咁好服務，邊會有人買佢啲相吖！不過為咗鼓勵佢嘅熱誠，結果我哋都買咗一張，多謝1,000円……﹞
大家認真啲睇吓下面張相，就會發現一個關乎魚類命運嘅驚世預言揭露於最左手邊嗰個朋友手中…… 仲未睇到？
﹝串本海中公園入口處﹞
哈哈……就係個朋友將手上條魚倒轉咗囉，結果去完旅行返到公司，發現枱面成缸魚仔十幾條全部反晒肚…… 難道佢真係個女先知？﹝後記：經過一番研究後，我哋估計啲魚嘅死因應該係，有人成個星期唔喺office，房門閂咗又冇開冷氣，啲魚仔咪缺氧而死囉，真可憐，咁就冇咗十幾條魚命~~﹞
言歸正傳，講返呢度有咩嘢睇先啦！同一般水族館差不多，都係睇吓魚、蝦、蟹同埋珊瑚咁啦，不過最特別都係呢度有個海龜館，個海龜池裡面養咗好多巨型大海龜，其中有隻仲係白色嘅tim~~
﹝串本海中公園﹞
又估吓我哋喺度做乜？朋友話：既然嚟到海龜館，不如一齊扮海龜喎！
﹝海龜館﹞
旁邊仲有個型爆叔叔攞住隻海龜仔比人影相，等啲遊客嚟個親親小海龜，只要一行埋去，型爆叔叔就會示意叫你伸手出嚟，唔使驚，未係比隻海龜你玩，只係噤兩下洗手液，等你清潔吓隻手先，再教我哋應該點樣捉實隻小海龜，先至將佢條龜命交喺我哋手中……不過你咪睇佢龜仔細細，其實好大力㗎，一攞住佢，佢對手不斷抓之餘，對腳又博命係度yarn，我對手就慘嘞，影完兩張相放低左佢，就發現隻手比佢抓到一劃劃……雖然係咁，捉住佢既感覺好過癮~~
﹝親親小海龜﹞
離開啲海龜，我哋就出咗outdoor去參觀個海中展望台，經過條紅色欄杆長堤+鐵橋，就到達個圓dum dum、白懞懞嘅塔仔，呢個就係海中展望台嘞，不過行出去呢段路都幾大風，有時旁邊啲浪仲會拍到上橋面tim，一個唔留神就有機會濕身架嘞~~ 小心！
﹝從海龜館到海中展望台﹞
幾經辛苦，吹到人都顛埋，終於行到嚟個展望台入口；旁邊放咗一籃類似魚糧嘅物體，仲插住個100円牌喺度，應該係比人買嚟餵吓嗰啲喺展望台附近搵食嘅魚咁，因為呢度真係有好多魚，而且條條都好大吓，我諗dum啲嘢食落去嘅場面，應該都會幾震撼，不過呢度人都冇個，唔知邊位負責收錢呢？
﹝海中展望台外﹞
入到去我哋就跟指示，沿住樓梯到下層，原來只係見到好多圓形窗仔嘅通道，遊客可以喺啲窗仔度望吓出去水底嘅情況，不過可能水流唔係咁啱，個個窗望出去都係朦查查，而且上面又冇人餵魚，所以都唔見有好多魚游過，有啲失望！
﹝圓形窗仔@海中展望台﹞
行咗個圈，我哋就出返外面lu~~因為其實呢度都冇乜嘢好影，不過見老公同條鐵欄都係紅色，就用吓部相機嘅單色功能，影返張無聊相啦！
﹝紅色嘅欄杆+紅色嘅老公﹞
去到岸邊，咁啱見到有架船泊咗喺個碼頭仔度，原來呢度仲有定期航班載人出海睇珊瑚喎，至於有冇珊瑚睇呢，我就真係唔知嘞，只係知道老公同啲朋友對個『珊瑚道~~』嘅木牌勁有興趣，真係唔知有乜好影！
﹝道道道道……『珊瑚道~~』﹞
『珊瑚道』嘅另一邊風景其實都幾靚，而且天色又好，海邊一舊舊，似石非石嘅物體，睇起嚟有啲似火山熔岩流咁，唔知會唔會係若干年前火山爆發造成嘅呢？哈哈……估吓咋，冇根據㗎！
﹝『珊瑚道』另一邊嘅熔岩流？﹞
開心既時間過得特別快，又到集合既時候嘞，臨走前就梗係要喺個門口影返張合照啦，不過朋友又去咗廁所，所以都係幫串本海中公園同水族館入口合個照先啦……哈哈！
﹝串本海中公園&水族館﹞
之前都講過啦，我地出發前，和歌山打大風，搞到我地去唔到那智，其實仲連備長炭館都冇得去，好似話比水浸左喎，是但啦，總之就係冇得去啦，所以就無端端去咗梅干館，呢度就好似個食品加工工場，有的人喺度包裝，有的人就做QC，有的人就梗係唔知喺度做緊乜啦！
﹝梅干館﹞
呢個館行到最尾就係手信店嘞，而呢間手信店就梗係主打賣梅嘢啦，唔係見到都唔信，呢度嘅梅製品，大大話話都有一千幾百種，除左最普通既梅汁、梅酒、梅湯之外，仲有梅麵、梅肉干片、梅啫喱、梅朱古力等等，而我覺得最特別，都應該係梅味雪糕，朋友話都幾好食喎，不過因為我唔食梅，所以就買咗布甸味雪糕，都好好味呢！
﹝梅味雪糕&布甸味雪糕﹞
離開左梅干館，我地就啟程返酒店，今晚既晚餐係喺酒店食懷石料理，之後浸溫泉，返到酒店個天都仲好光，攞完鎖匙上到房一望……哈哈！原來又係海景房，間房好大，仲望到樓下有間教堂仔同泳池tim~~
﹝紀州南部皇都露天溫泉酒店﹞
見未夠鐘食飯，我哋就落咗樓下，諗住影吓間教堂仔，點知影得兩影，我哋啲低能病又發作，諗住較10秒自拍嚟一張集體教堂跳，點知……
第一跳：大家跳完，個相機都未影……唔得，再影過；
第二跳：相機影咗，但大家都未跳……唔緊要，再影啦；
第三跳：又有人發緊夢……點呀；
第四跳：有人跳咗出鏡頭外……；
第五跳：跳到件衫縮起咗……；
第六跳：跳得好唔齊……；
：
：
第N跳：唔跳嘞，好攰呀！
﹝教堂跳﹞
跳跳吓都已經黃昏嘞，而且大家都好攰，結果我哋行咗去個泳池邊坐咗一陣就行返上酒店食飯lu~~臨走前，都係幫間教堂影返張正正經經嘅相啦！
﹝日落後的教堂仔﹞
由於大家對前一晚嗰餐一泊兩食非常滿意，所以直覺上認為呢餐食懷石料理，應該會更OK，點知就竟然有啲失望……
﹝懷石料理前……期待﹞
其實呢餐都唔算好差，除咗飯、麵之外，起碼魚生、天婦羅、湯、蛋、前菜、煎魚、火鍋、生果……樣樣都有，只係魚生實在太少、熟食唔多夠熱，同埋唔係太啱口味咁啫，不過有啲奇怪就係，佢將啲本來好好食嘅三文魚攞去又烚、又蒸，唔篤吓佢都唔知到佢係魚，硬到成舊石頭咁，難道怕我哋啲中國人話佢啲嘢整得唔夠熟？
﹝懷石料理中……﹞
呀！幾乎唔記得咗，由於我哋係跟東x遊嚟日本，領隊話公司會送一人一隻刻咗名嘅木製酒杯比團友，仲攞咗支日本米酒請團友飲tim~~其實我哋可以話一早就知，因為5年前跟佢哋去仙台嗰時，同樣有呢份禮物，當時都幾開心嘅，不過估唔到5年後嘅今日都仲有貨唧……哈哈！
食飽返房hea咗一陣，我哋就落咗去浸溫泉，呢間酒店嘅浴場面積比較大，換衫吹頭嘅地方都好大，而且仲有幾種唔同嘅池水，可以比人浸吓呢樣，浸吓嗰樣，其中我覺得備長碳池就應該最特別嘞，池水係黑黑哋色嘅，不過可能呢日都比較攰，我哋只係浸咗一陣，沖埋個涼，就上返房瞓lu~~
留言列表
