松此放眼看世界

﹝2011年09月14日﹞

紀州南部皇都露天溫泉酒店 > 紅葉溪庭園@和歌山城 > 黑潮市場 > 有馬玩具博物館 

又一個和歌山早晨嘞……可能尋晚真係有啲攰，今朝晏咗起身，只係喺酒店樓下行咗一陣，不過雖然係一陣，我哋都有啲 target 嘅﹝香港人嘛~~﹞，就係要去影返酒店門口個舊郵筒，同埋去停車場另一邊，望吓個大風車﹝風力發電機﹞……哈哈，竟然無意中比我哋發現到個冇水嘅免費足湯 tim，話得冇水，就即係免費都冇用啦，唯有坐喺度，扮晒嘢，影張相就算啦！ 

﹝和歌山早晨！﹞ 

呢間酒店嘅早餐同前一日差不多，除咗西式嘅腸仔蛋外，仲有日式嘅粥、粉、麵、飯，當然唔少得和歌山特產 -- 『梅』啦！﹝過埋呢餐，就唔使再見到佢喇，哈哈！﹞ 

﹝『梅』汁、『梅』粥 &『梅』乾，再見喇！﹞ 

之前都講過，由於打風打爛咗那智瀑布條橋，所以去唔到，結果就嚟咗呢個叫『紅葉溪庭園』嘅地方，其實呢度根本就係和歌山城嘅前園，一個唔使錢入場嘅大公園，不過呢度都幾靚，有小橋流水，仲有啲依家仲係綠色嘅『紅葉』。﹝同那智比，就當然冇得比啦！﹞ 

行到斜路前面，仲見到有個箱裝住啲竹支，大家二話不說就一人攞起一支互相攻撃，影低咗佢哋啲罪證之後，就發現原來啲竹係有用途嘅…… 

﹝紅葉溪庭園@和歌山城﹞ 

呢啲『善意の扙』其實係比有需要嘅人用嚟篤吓、篤吓行上山嘅，攞去用完後，落山時放返低就得……日本人真係一個『善意の族』呀！ 

﹝『善意の扙』﹞ 

經過一段斜路同少少樓梯之後，我哋終於見到和歌山城 lu~~ 上呢個城樓，係要比錢嘅，不過有啲團友就自費入咗去參觀，而我哋就只係喺附近噤咗幾罐汽水，hea 住咁東影吓、西影吓，冇上到去，因為我哋仲想喺度搵吓有冇印『cup』，點知四圍行晒都唔見，於是就問領隊哥哥啦，點知佢話個印應該放咗喺士多門口，不過今日士多冇開門，所以應該鎖埋咗喎……唔係咁啱fa！千里迢迢嚟到都印唔到；仲要一個不留神比隻衰蚊咬咗一啖喺個手臂度，腫咗成大嚿……好慘呀！ 

﹝和歌山城﹞ 

離開呢個紅葉溪庭園，我哋就會到和歌山嘅最後一站 - 黑潮市場，其實呢個黑潮市場係一個大型遊樂場裡面嘅食肆同買手信嘅地方，而且同場加插咗生劏吞拿魚表演，呢個亦都係我哋今日嚟呢度嘅其中一個目的，好似話呢個表演一日只係得一場，所以想睇嘅話，就真係要check清楚個『劏』期喇！咁又係嘅，如果佢日又 劏、夜又劏，咁劏劏埋埋啲魚搵邊個買噃~~

至於呢個表演好唔好睇呢，就見仁見智啦，不過無可否認，呢個哥哥劏得好專業，而且一邊劏，仲一邊講解 tim~~ 雖然我唔知佢講緊乜，但係睇佢劏到青筋都現埋，就知道呢份工一啲都唔易做……佩服！

﹝黑潮市場﹞ 

嚟呢度，我哋除咗睇劏魚外，第二個目的就係順便喺度食埋晏；不過呢餐就真係超飽lu~~因為我哋四個喺團餐以外，仲加多咗兩隻魚生船，同埋一大板海膽，而且由於要預返之後嘅長車程，所以今日要早啲食晏，結果團餐嘅食物就連壽司都食唔晒；其實啲嘢食都唔錯，只不過係我哋實在太飽喇！

﹝最後午餐@和歌山﹞ 

食完嘢，我哋都喺度買咗少少手信先走，不過當上咗旅遊巴，至發現原來個市場後面都幾靚，而且團友話，就喺對面有個生果市場，啲生果又平又靚 tim~~冇去到，真係有啲可惜！算啦，唯有下次再嚟過啦……哈哈！ 隨住離開黑潮市場，和歌山行程就結束lu；下一站 - 神戶有馬溫泉區。 

由於沿途都真係冇乜嘢好影，結果我哋都好少有地喺旅遊巴瞓咗覺，醒返嗰陣，都差不多嚟到神戶嘅有馬溫泉區lu~~ 不過行程帶我哋嚟呢度，絕對唔係浸溫泉，而係去睇有馬玩具博物館；我哋落咗車，沿住條河側邊行，轉個彎，離遠就見到間博物館嘅木偶公仔 logo喺座大廈外牆上面，臨轉上小路前，仲比我哋見到架好得意嘅觀光巴士tim~~

﹝有馬市內觀光巴士Arima Loop Bus﹞ 

轉咗上個博物館附近啲橫街後，就覺得有啲似去咗日本古代嘅地方，同圍都係矮矮嘅瓦片屋頂平房；不過由於個博物館要收入場費，所以我哋就乖乖跟咗大隊入去參觀先啦，睇完玩具出返嚟，有時間先可以四圍行吓lu~~

﹝有馬玩具博物館﹞ 

個博物館共有6層，好似話係由旅館改建而成，裡面收藏咗好多種來自唔同國家、年代嘅玩具，除咗木製玩具、火柴盒屋仔外，仲有布偶公仔同『機關玩具』等等。如果我哋有時間，都可能會行耐啲，不過我哋嚟呢度仲有啲嘢要做，所以快行快閃就算lu~~

﹝古今中外嘅玩具都有@有馬玩具博物館﹞ 

哈哈……就係為咗要嚟呢度浸免費足湯！因為話晒有馬溫泉都係日本三大古老溫泉之一嘛，免費都唔浸吓，會唔會好蝕呀~~

﹝足湯中@有馬溫泉區﹞ 

點解有馬嘅溫泉會咁出名？好似話係因為呢度嘅溫泉水含有兩倍海水濃度嘅鐵同鹽，當呢啲含鐵嘅鹽泉湧上地面同空氣接觸，泉水就會氧化變成鐵色﹝金湯﹞，再同無色嘅碳酸泉水互相浸泡﹝銀湯﹞，就能醫百病喎！至於呢個足湯啲泉水咁渾濁，一睇就知係﹝金湯﹞啦，如果想『能醫百病』，就要比錢浸埋﹝銀湯﹞喇！

﹝『能醫百病』 x 1/2﹞ 

浸完腳就沿路行返去舊街，食神戶六甲牧場出產雪糕，雖然只係得綠茶同牛奶味，但係已經好滿足 lu~~

﹝六甲牧場綠茶牛奶雪糕﹞ 

我哋一邊食，一邊影相，結果又遲咗返去集合！唉！

離開咗有馬，我哋就去神戶三宮行街街，想知有乜趣事同『燸』事，就留意日本關西の旅 Day 3b喇！