『各位團友早晨,先恭祝大家中秋節快樂,究竟香港個月亮圓d,定係東歐個月亮圓d呢,大家今晚睇完再話我知吖,唔該!
今日我會帶大家去睇地下湖,二次大戰時,希特拉曾經喺呢度製造過戰機,因為打敗仗,所以都係要離開呢度,好多年之後有人掘井時就比人發現咗呢個地下湖;睇完地下湖之後,我哋會去遜布倫宮,又名美泉宮,又稱冬宮,係以前皇帝住嘅地方;跟住我哋就會食飯,今餐會食奧地利豬扒餐,團友可以自費購買當地啤酒族豬扒;食完豬扒後,我哋會行一行莫札特廣場,然後到附近嘅荷夫堡參觀,又稱夏宮,都係以前皇帝住嘅地方;睇完荷夫堡就去百水公寓,又名古怪屋,係以前一位古怪嘅設計師百水先生做嘅,因為佢行為怪異,鐘意唔著衫,而且d設計又以不規則見稱,同當時嘅設計有好大嘅分別,所以有古怪之稱;之後我哋會離開奧地利,轉入捷克嘅古姆洛夫,會喺酒店食飯,而今晚間酒店叫做Hotel Mlyn。』
﹝2008年9月14日上集﹞
一起身,嘆完個早餐之後,我哋就上車去睇呢個地下湖,聽完個導遊講解完之後,我都唔係好明,喺個地下湖點樣可以做飛機?唔通希特拉想整水陸兩用機?
﹝地下湖入口﹞
幸好,當日天氣已經轉涼,只有13°C左右,所以個地下湖得9°C都唔覺得凍。
﹝只有9°C的地下湖﹞
一路行嘅時候,條地道都唔係咁啱我行,有幾段樓底比較低,我要dup低頭先行到,在此提醒各身高6呎或以上人士,進入此地道者,必然明白何謂「頂天立地」,不過唔可以「挻起胸膛」做人,哈哈~~
﹝在地道的我,已經唔可以「挻起胸膛」,真係要「頂天立地」@@﹞
由於洞內尚未有遊客o黎到,所以水面及周圍都比較寧靜,乘坐小船遊地下湖時,就可以見到何謂波平如鏡。
﹝地下湖一角﹞
行完地下湖就過咗去睇遜布倫宮,個宮入面好焗,而且唔比影相,真係好想快d行完快d走;期間,個導遊介紹咗兩個雕像,係一個好靚﹝佢話﹞嘅公主生BB前同後嘅雕像,我一見到就即刻話「如果我係女人就一定唔生!」點解呢?因為生BB前個雕像係白色,都幾靚;不過生完就變咗個黑色雕像,咁你話邊度會有人肯生吖!
行完個宮就出咗去個後花園參觀,一出個門口就眼前一亮,嘩~~~又真係幾靚wor~~影下相先,正想行去個公園睇下時,點知落雨!唉~~菲菻機又要收埋,真掃興,咁就用數碼機啦~~算啦,落雨都可以影相嘅。
﹝遜布倫宮﹞
遊完遜布倫宮就去食飯,今餐食奧地利豬扒餐,我哋仲叫咗地道嘅啤酒同汽水飲,正!
﹝豬扒餐﹞
因為個老闆非常之好客,縱使言語不通,佢仍然熱情招呼我哋,臨走前都同佢影番張相先走。
﹝餐廳老闆﹞
睇住咁多先,飯後行程轉part b。
留言列表