﹝2011年09月15日﹞
﹝神戶 > 環球影城﹞
今個朝早勁好天呀！終於可以清清楚楚咁欣賞吓個神戶市……由酒店向神戶港方向望過去，原來呢度一帶嘅城市規劃到好似SimsCity咁，勁整齊，而且仲有好多綠化區tim~~好醒神呀！而我哋晨運嘅目的地呢，就係下圖嘅左面中間位置，啡啡哋色嗰度附近，因為嗰度可以望返過對岸，即係前一晚去過嘅神戶港，睇完夜景，都睇吓個日景嘛……不過其實原本我哋係諗住沿住條電車路行去『北公園』﹝即係圖中近右上角紅色橋下面﹞，但係望吓望吓，又好似有啲遠，而且唔係一條直路去得到，結果『放棄』吧！
﹝神戶日景﹞
落咗天橋行到去酒店前面，就梗係要同佢合個照先啦！『1~2~3~笑！』
經過尋晚嗰間便利店冇幾遠，就到下一個電車站，再行冇幾遠見到個路牌，我哋就上咗側邊條天橋，喺橋上面望返落嚟嘅景物，同Google pre-visit 嘅差不多，有興趣就自己上Google睇啦！哈哈！
﹝晨運中……﹞
原來呢一帶都係學院區，喺橋上面已經見到間『神戶女子短期大學』﹝點解大學有長期同短期嘅？長期大學，莫非即係畢唔到業？哈哈……﹞落到橋就係『神戶學院大學』，隔嚟仲有間『XX醫科學院』咁啦！
講到呢間『神戶學院大學』，門口個『實Q』真係好好人，明明有個牌寫住除學生、職員外不得進入之類……但係佢見我哋望望吓，就竟然行過嚟叫我哋入去參觀噃 ……正！
唔知日本今日係咪假期呢，定係我哋嚟得太早，成間學院好似空無一人咁……不過呢間嘢真係好鬼大，如果喺度讀書，轉堂個課室要由學院頭行到學院尾的話，我諗最少都要遲到半個鐘~~
﹝神戶大學s﹞
大學外邊仲有個長堤，可以比啲學生hea吓，而呢度亦係我哋嘅目的地，不過原來日頭望過神戶港，係一啲特別都冇嘅，再加上呢度望過去實在太遠，相機zoom到盡都只係勉強睇到……算數，好在比我哋發現到樣意外收穫，就係有個寫住『神戶2011』嘅靚靚貨櫃放咗喺度，雖然唔知佢要嚟做乜，但係都總算係『生招牌』吖，就咁算啦！
﹝神戶大學長堤&『生招牌』﹞
回程時已經攰到唔想再行，而且想多啲時間食早餐，所以我哋決定去試搭電車返酒店，其實200円搭兩個咁近嘅站，真係幾貴，仲由於係返工時間，車廂勁多人，同喺香港搭地鐵不忙多樣，唯有等啲人走晒，影吓個月台同車尾算啦！
﹝Portliner電車站月台﹞
話都冇咁快就返到酒店lu~~呢間酒店好特別，係有兩個地方食早餐嘅，一個喺2/F，另一個喺31/F，領隊話31/F嗰個會多人啲﹝有靚view嘛﹞，不過如果晏咗就要去2/F嘞……我哋就梗係上31/F試吓有冇位先啦，冇位嘅話，聽日都可以早啲落嚟食過，因為我哋會喺度連住兩日嘅！
……好彩有位，不過就冇晒窗口位，唔緊要啦，聽朝再嚟過！講返啲早餐，其實好一般，最好食就係呢個即製庵列，可以自選餡料，仲可以加芝士，走洋蔥……正！
﹝即製庵列@神戶博酒店31/F﹞
離開酒店，我哋就去行程安排由朝九玩到晚六嘅景點 -- 環球影城，而我哋，就梗係唔會喺度玩一日咁耐啦，不過之後去咗邊呢？就留返下一篇先講……講返呢度先，由進入『城』區，到個真正入口其實都幾遠，個感覺好似『迪迪尼』，我哋就喺個轉吓轉吓嘅Universal Studio附近一邊等領隊派入場券，一邊就同個『轉轉』影相，起初好難影，一係好多人經過，一係個字就唔知轉咗去邊，不過影影吓竟然冇晒人，就連自拍都影到正正"UNIVERSAL"個字，勁呀！
入到場第一件事，就梗係去幫朋友搵厠所啦，不過喺厠所附近比我哋見到個locker區，有啲locker仲大到連人都放得落，真係拖埋個喼嚟玩都冇問題噃！
﹝環球影城入口一帶﹞
再行入啲就係購物長廊，好似話呢度間『貓店』賣嘅嘢係出面買唔到喎，不過我對隻『冇咀貓』真係冇乜興趣，都係臨走有時間至去睇吓啦；不過話都未講完，門口就已經見到架『貓車』同隻『貓』喺度跳舞兼影相，轉個頭仲見到有個人喺度幫人畫『貓樣』tim~~救命呀，乜環球影城原來已經變咗個『貓城』，就連10週年背景都係以『貓』為主，真係總有一『貓』喺你左近！
﹝被『貓』淪陷咗嘅環球影城﹞
離開『貓區』，終於去到環球影城中心嘅機動遊戲區，由於我哋年紀都唔細，加上又唔想整濕身，所以就只係揀咗幾樣嘢嚟玩，target咗大約2:00前會走咁啦……而我哋玩嘅第一樣嘢，就梗唔係Jurassic Park啦，坐住隻船睇恐龍，再連人帶船由5層樓高俯衝落湖，肯定濕到『亞媽都唔認得』！不過有啲blog友就話，如果唔介意濕身，都值得玩喎~~
﹝Jurassic Park﹞
其實呢個樂園都幾貼心，知道天氣熱，周圍都有霧水花灑設備幫人降下溫，如果你想濕少少但又唔想咁濕，可以輕輕路過refresh zone，啲水就只會『long』喺你啲毛上面，吹兩吓就冇咗；想要濕啲咩，大可以好似老公咁，放個頭靠近出水口，等佢瀑出嚟，猛大埋個口，仲可以飲埋水tim~~﹝注意：水質安全程度未經證實能否飲用，飲後若有身體不適，與本人立場冇關！﹞！
﹝Refresh Zone﹞
玩完水之後就去咗玩火，唔係，應該係『睇火』至真！去咗好多人都話好睇嘅『烈火雄心』度睇吓佢有乜咁好睇……不過，呢度真係難以用三言兩語形容到我哋嘅感受……頭嗰個環節，睇戲，悶到爆；第二個環節，都係睇戲，悶到爆 x 2，再行入一個房，終於有實景場面，不過頭10分鐘，依然悶到爆，正當你懷住絕望嘅心情想XYZ佢之際，忽然『砰砰』、『嘭嘭』咁，邊爆炸、邊冧嘢……就喺呢個時候，朋友冷靜地影咗以下幾張相，將整個『烈火雄心』最精彩嘅2分鐘拍低咗。
鏡頭嘅另一邊就係一對『無蝕底』嘅日本遊客，一入到場，佢兩個就即刻霸住個最前排，但係當啲嘢爆到九彩，再加上熱力逼人嘅時候，佢哋竟然逐步『tun』後，仲幾乎踩到我老公tim，當佢哋『tun』到去一個安全地方嘅時候，跟住就散埸lu~~
﹝『烈火雄心』最精彩嘅2分鐘﹞
『烈火雄心』呢個策略都唔錯，激到你接近『臨界點』嘅時候，就用最後2分鐘『洗底』，完咗你都只係記得呢兩分鐘，仲邊會記住之前虛度咗嘅時光吖……高招！再加上出到嚟，天色風和日麗，乜嘢怨氣都消晒啦~~
﹝風和日麗嘅樂園﹞
我哋下一站會去玩『豬豬俠』，不過途經一條小街巷，見到好多人排隊，原來呢度有個『豬豬俠』地盤，要影相嘅，就沿住老公身後嘅橫巷直入，不過要比啲耐性……等！我哋呢啲趕時間嘅人，就梗係『下次先啦！』
﹝『豬豬俠』地盤﹞
終於嚟到被網友予以『最好玩』、『要排最長龍』嘅『豬豬俠』喇！
我哋決定用咗張fastpass，希望盡快KO咗佢，於是二話不說就走入去排隊，行咗好耐終於搵到個職員，個職員見我哋用fastpass，就帶咗我哋出返門口行另一邊……原來我哋排錯隊！當直入到去近上車位置時，我哋就知道應該真係去排隊，而唔係用fastpass，因為根本就唔係好多人，不過冇辦法啦，張fastpass都比人收咗咯！
﹝唔係好多人排隊嘅『豬豬俠 Spiderman』﹞
雖然都幾好玩，但係對於無端端浪費咗張fastpass都係耿耿於懷……點知，去到排『大白鯊』……唔係啩！多人排過『豬豬俠』幾十倍喎！~~『可唔可以比返張fastpass我哋呀？』﹝『大白鯊』室內嘅人龍+同『大白鯊』搏鬥中嘅人類 ﹞ 排咗個幾鐘，终於見到龍頭……至於好唔好玩就見仁見智啦，不過有個小朋友比突然喺水裡面撲上嚟嘅大白鯊嚇到喊lor~~所以帶小朋友嚟嘅家長就要注意喇！
﹝多人到冇朋友嘅『大白鯊』﹞
﹝玩完大白鯊，仲可以喺禮品店『大白鯊』吓~~﹞
留言列表
