『各位團友早晨,今朝早依然落雨,足以證明大家全部都係貴人,哈哈~~陣間我哋會冒雨行呢個古姆洛夫市政廳及舊城區一帶,去到一個較高嘅地方時,大家可以睇晒成個古姆洛夫小鎮,呢個實在係一個好靚嘅地方;之後我哋會去卡羅維法利溫泉區食午餐同遊覽,呢個溫泉區唔同大家去日本韓國嗰種,大家唔洗換衫去浸,因為呢度d溫泉水係飲落肚嘅,呢度嘅溫泉水係帶有藥用療效,大家可以帶定水樽去裝o黎飲,不過大家要小心d,因為唔同泉水會有唔同溫度,如果大家無帶樽都唔洗驚,去到溫泉區之後,大家可以幫趁唔同檔口購買當地特色溫泉杯,揀啱先至買;行完溫泉區之後,我哋會入布拉格,並入住Hotel Wienna。』
﹝2008年9月15日﹞
其實,呢個東歐trip我最期望就係呢一度,最失望都係呢度;無論上旅行社聽講解也好,聽朋友講也好,甚至上網睇都係話呢度係一個好靚嘅地方,去到我都相信係一個好靚嘅地方,只不過差就差在落雨吧。嗰場雨由尋晚落到今日,一心諗住部菲菻機可以盡情地發揮,點知……唉~~~唔好提啦,都係繼續用部數碼機啦。
﹝出門口時影番張相先﹞
跟住就一路向上行就去到市政廳一帶,唉,真係福無重至,禍不單行,竟然肚痛!算啦,去完廁所就繼續行啦,我都無乜心機去影呢個市政廳,求其影下就算……
﹝市政廳附近﹞
之後再向上行,就係呢個境叫我有番dd心機去影相,都叫做比我見下呢個古姆洛夫城嘛,我相信唔落雨的話,個境一定好靚,部FM2同我都一定會好開心
﹝古姆洛夫﹞
可能心情好番dd吧,穿過舊城區時,都用多少少心去留意下身邊d境,原來下雨天嘅古姆洛夫都幾靚吖。
﹝舊城區風貌﹞
上旅遊車後就前往往卡羅維法利溫泉區,個導遊話我哋會喺卡羅維法利溫泉區自費食lunch,我都好期待可以一邊嘆lunch一邊嘆下溫泉水,唔知係唔係人窮行路打倒「tun」,個司機竟然行錯路!呀~~~我好想發顛呀~~~
聽個導遊講,好似話個司機部自動導航系統唔update,所以行錯路,有無搞錯呀!你d搵食架生唔掂的話,你又點出o黎做呀!結果行錯路嘅代價就係無得去溫泉區食lunch,去咗一個休息站食飯,都好,食飽飯仲可以行吓隔離個超級市場,仲買咗2排河馬樣嘅kinder。
﹝休息站﹞
1個鐘後,終於到達卡羅維法利溫泉區,第一條見到嘅走廊都好靚。
﹝溫泉區走廊﹞
之後就行咗入溫泉區,入面有好多唔同嘅溫泉,溫度都唔同,而我身後呢個溫泉就係成個溫泉區入面最大同最熱嘅,水溫好似有70°C以上,最高可以射上10幾米。
﹝溫泉區最大最熱嘅溫泉﹞
﹝一路上都見到唔同嘅溫泉﹞
其實,一路行嘅時候都係落緊雨,要影相一d都唔容易,除咗怕濕咗部相機外,被影者都幾麻煩,打傘,又會遮住個景,唔打,又怕成身濕晒,還好,之後有段時間無落雨,可以影得舒服d。
﹝卡羅維法利溫泉區一帶﹞
一場o黎到,點都要買番隻溫泉杯嘅,咪睇佢好靚好正咁,其實佢好脆o架,有個團友呢頭買咗,一個轉頭就打爛咗,又要再買過。
﹝我買嘅溫泉杯﹞
大約1個鐘左右,咁就行完個溫泉區,又係時候上車去布拉格lu~~今晚就會食捷克豬手餐,味道都唔錯,不過就咸咗dd,個導遊話當地人係特登整咸d,等d人多d幫趁佢哋買啤酒wor~~好似有d茅茅地wor~~
﹝捷克豬手餐﹞
食飽飽就返酒店,導遊話我哋會住Hotel Wienna﹝維也納酒店?﹞,但去到個酒店名係Hotel Galaxie﹝銀河酒店?﹞,更奇怪就係個招牌同香港嘅Pizza Hut差唔多,唔通呢間係專賣香港Pizza嘅維也納銀河酒店?@@
﹝Hotel Wienna / Hotel Galaxie﹞
留言列表