松此放眼看世界

﹝2011年09月15日﹞ 

環球影城 > 梅田 > 神戶 

離開咗超多人嘅『大白鯊』，就要急急腳走去『水世界』；我哋唔係怕佢開咗場，而係怕後排冇晒位，要坐得好前……皆因有網友話，喺每場表演之前，啲表演者都會拉啲坐前面嘅觀眾出去玩，又或者比佢哋用水潑到成身濕晒，如果唔想濕身或者比人玩，就記得唔好坐頭幾行喇~~

﹝水世界表演前﹞ 

有相為證，啲表演者真係成埇水潑向觀眾，但係被潑嘅人又好似好enjoy咁喎！﹝原來日本人真係傻o架！﹞

同觀眾玩完遊戲，正式表演就開始lu~~不過個表演全程都係講日文，究竟做乜呢？就真係唔多明白，大概都係海盜、尋寶、英雄救美咁啦，加埋最尾嘅墜機及連環爆破就完埸；雖然聽唔明，但一啲都唔覺得有悶場，都算幾好睇，不過如果有翻譯就更好嘞！

﹝爆破場面@水世界﹞ 

其實行程係安排我哋可以喺度玩足一日嘅，但係我哋就決定睇完水世界表演就離開環球影城，因為仲有好多地方plan咗想去嘛~~

不過我哋原先係打算早啲返出大阪，去『魚心壽司』食晏晝嘅，可惜喺度排隊嘅時間比預期長好多，出到『城門口』都差不多三點，大家已經好肚餓，有朋友仲餓到要去老麥食個飽先可以再行，真係可憐！唉！

﹝影城外食店林立，見到點會唔餓吖！﹞ 

不過最好笑係當朋友食完個飽出返嚟，就比我哋見到間壽司舖，啲壽司實在太吸引~~所以又入去食過……哈哈！

﹝午餐@大起水產﹞ 

可能已經過咗食晏時間啦，間壽司舖冇乜生意，正因為咁，我哋可以慢慢食、四圍影相，仲發現日本人真係認真到竟然連壽司豉油都有四種，不過我哋對豉油就冇乜硏究，只係覺得有啲鹹啲，有啲冇咁鹹，我諗可能係用嚟點唔同嘅壽司啩……其實重點並唔係呢樣，而係今日嘅『是日精選』：海膽+三文魚子+蟹腳壽司都好似係三佰幾円咋，超抵食呀！

﹝超抵食午餐﹞ 

食飽飽就正式起程返大阪，開始我哋『自由冼』時間lu……let's go！

﹝JR環球影城站﹞ 

要由環球影城站搭返去大阪﹝即梅田﹞，就要喺西九條轉線，我哋買完車票就怱怱走落月台，因為時間已經比預期遲咗兩個鐘，又好似聽到有列車埋站嘅聲，點知落到月台原來未有車……唔緊要啦，東影吓、西影吓，影影吓就已經有車嚟lu，點知竟然企正喺個女性專用車卡……唉，於是唯有跑過兩卡車啦，唔係老公就要搭下一班車，哈哈~~

一入到車箱，我哋就覺得熱到痴肺，起初以為冷氣壞咗，但係見車箱裡面其他人都冇乜反應，就知有啲唔妥……原來我哋入咗個『弱冷車箱』，救命呀！點解大熱天時都仲要弱冷ga，想熱死人咩！！

﹝列車陷阱@JR環球影城線﹞ 

『熱死人』嘅情形，原來唔單只係喺『弱冷車箱』會發生，去到大阪仲慘，我哋喺大阪站個出口過唔到馬路，局住要行返入地下街；喺地下街嘅指示牌又唔清晰，睇咗好耐，我哋都唔知要出邊個出口，呢度又因為要節能，根本就感覺唔到有冷氣，熱死人x2！！

﹝『熱死人』嘅大阪駅﹞ 

好唔容易搵到個出口去Hep Five，已經成五點半，點知行到去個入口，竟然發現『冇開門』！！成座商場連食肆都冇開，只係貼上：『是日節能，休息一天！』……天啊@#&^~~

……見唔到巨鯨、玩唔到摩天輪、仲要熱到成身濕晒……

﹝休日中的Hep Five﹞ 

因為實在太熱，而且行到已經筋疲力盡，我哋去咗附近嘅百貨公司hea咗陣，又要繼續行返落條熱死人嘅地下街；經過個廣告燈箱，呢度就係我哋想去嘅Hep Five摩天輪，去唔到，唯有影張相算啦！

﹝Hep Five摩天輪……廣告﹞ 

穿過地下街，又行返去JR大阪站，繞過個車站，離遠就見到我哋嘅下一個景點 -- 藍天大廈，不過唔好開心住，要行多十幾廿分鐘先會到，仲要經過條類似地盆通道同行人隧道至過到去；我哋去藍天大廈目的係乜？就係為咗睇夜景囉，不過，未上去睇夜景前，先落basement醫咗肚先~~

﹝藍天大廈 Umeda Sky Building﹞ 

Basement呢個有嘢食嘅地方叫『淹見小路』，起初以為只係個food court，原來行落都幾特別，好有古代江戶feel，除咗食嘢嘅地方外，仲有啲賣乾貨嘅舖頭，同埋一間迷你神社，唔知係咪因為年頭發生地震嘅關係，間神社仔外面掛咗好多祈福紙條，有啲舖頭仲寫明賣災區貨品tim~~

反觀香港，好多商人當知道日本有事，就割蓆分家，怕受牽連，真係好冇人情味……

﹝淹見小路﹞ 

我哋行嚟行去，結果揀咗呢間屋酒屋食晚餐，order咗兩個和風拉麵、咖哩豬扒烏冬同鰻魚飯，仲有啤酒。

個咖哩豬扒烏冬係老公食嘅，上烏冬時，佢哋好細心咁比埋件紙製嘅『口水肩』佢，相信係驚佢『shsh』聲食烏冬時，啲咖哩汁會彈污糟佢件衫，啲日本人服侍得真係好週到！

老公話呢度啲咖哩好得呀，有咖哩味之餘又唔辣，既唔係一般『水 Long Long』嘅質地，亦唔係杰到成pat醬糊咁，稀杰程度適中，總之就啱晒佢口味啦，佢仲話啲咖哩好味到想當佢係湯咁飲埋，真係咁好味？可惜，我唔食咖哩嘅，做唔到佢知音人…

其間發生咗件小插曲，事源係我哋想問人攞多對筷子，但係又怕講錯，結果我哋幾個諗住細細聲練習多幾次句日文先叫人嚟，點知都未練熟，個待應姊姊就竟然攞咗對筷子比我哋，但係佢明明企喺幾丈遠，竟然都聽到？冇可能啩！原來係坐隔離枱嗰幾個日本人，聽到我哋喺度重複講呢句唔鹹唔淡嘅日文，於是幫我哋叫咗……真係唔該晒，而且證明我哋句日文都有人識聽喎，哈哈！食完嘢，臨走仲發現可以攞幾張空中庭園9折coupon tim，正！

﹝晚餐@淹見小路﹞ 

Let's go…上去睇夜景喇！

﹝空中庭園@藍天大廈﹞ 

幾乎唔記得咗，上去睇夜景係要首先到39樓轉電梯嘅；呢度有間手信店，除咗有『藍天大廈限定』貨品外，仲可以DIY整返個印有自己個名嘅金幣仔做紀念，同埋順便喺呢個Sky Post度買埋郵票寄postcard，一舉N得！

﹝Sky Post﹞ 

嚟到呢度，都唔記得咗介紹吓呢座藍天大廈tim；佢係由兩座大廈組成，兩座大廈之間就靠兩條凌空嘅電梯連接到最頂兩層360°嘅高級餐廳同觀景台，個設計都幾特別，不過如果畏高嘅朋友就可能會有啲驚驚嘞~~

﹝『驚驚』電梯﹞ 

我哋行完手信店再上去，就到咗一層可以通往空中展望台嘅樓層，而呢度有個合照景點，leung到爆，我哋根本冇諗過喺度影相，只不過，見到有一對日本後生仔女，好想搵人幫手影相，而當時就只有我哋呢兩個外國人經過，可能佢哋驚言語溝通唔到，所以唔敢搵我哋幫手，而老公就走去問佢哋攞部相機幫佢哋影相，正當呢個日本男仔想講點用部相機時，老公就對住佢耍晒手，因為佢哋同我哋用埋同一型號相機，仲要係同一個顏色tim，唔使多講啦！﹝又會咁啱嘅~~﹞

而呢個日本男仔都真係好有禮貌，老公幫佢哋影完呢個leung爆景點後，佢就話要幫我哋影返張，見佢咁有誠意，冇辦法啦~~『1…2…3…笑…』

﹝『leung到爆』合照景點﹞

呢個『心心』嘅另一邊係一大幅落地玻璃，成個大阪睇得一清二楚，仲有幾個高台仔，可以比啲情侶一邊談心一邊睇夜景，呢啲咁熱門嘅勝地就當然一早爆滿啦，所以我哋就再上一層，正式到達空中庭園展望台！

嘩嘩！又係大阪夜景呀！今晚雖然有啲雲，但係就冇乜煙霞，所以個景都好清，不過如果要影合照，就真係有啲難度喇，因為呢度實在太黑，而且好大風，外面又有個高高嘅圍欄，要影到人、又要影到景，非要舉高個腳架不可，要做到舉住個腳架都唔手震，對攝影師嚟講係咪有難度呢……所以，真係唔該晒Mandy，辛苦晒！

﹝老公插咀﹞

當我哋各有各行搵位影相時，我先聽到有人用廣東話講嘢，跟住就見到個好慘嘅男朋友仔，佢用部單反同個女朋友影相，影親都手震，比個女朋友係咁話佢，我見佢咁慘，就問個男朋友仔『不如我借個腳架比你用，我轉頭過嚟攞番啦~~』佢有啲唔好意思，但係都借用咗我個腳架。係呢件事上，我有兩個問題：

1) 呀男朋友仔，用得單反，應該唔係用Auto Mode吧，唔通係唔識推高個ISO？

2) 呀女朋友仔，影相吧，唔洗咁樣話佢嘅，佢都唔想手震 je，係咪？

﹝360°大阪夜景﹞ 

我哋影吓影吓，唔經唔覺已經十點鐘，都係時候要返酒店lu，臨走前影返張相，比大家睇吓呢度嘅環境啦，真係好鬼黑，同埋望住塊地都會感覺到滿天星……

﹝星際xx觀景台﹞ 

回程時，其實大家已經攰到又再拖住兩個鉛球先行得到去大阪駅，然後搭去三宮轉車返酒店；就喺極度疲累之際，竟然比我哋見到三宮駅都有個好靚嘅印仔喎，真係即刻醒咗一吓，不過cup完印就瞬間變番條死屍lu~~

﹝JR回酒店中﹞ 

返到酒店，真係乜都唔想做，只係想唔郁，瞓喺度……但係老公就堅持一定要先沖涼，皆因佢覺得比啲汗醃足一日，可能臭過條鹹魚，自己都頂自己唔順，見到佢件衫嘅鹽漬就知道我哋今日嘅苦況~~

﹝原來汗水曬乾真係可以做鹽喎！﹞ 

聽日就係行程嘅最後一日，想知大阪仲有乜好玩，就要耐心等候Day5嘅刊登喇~~