﹝2011年09月16日﹞
神戶 > 大阪 > 香港
行程好快就到咗最後一日，經過風景優美嘅和歌山區，玩過環球影城，嘗過又熱又攰嘅『自由冼』，都係時候要行吓街，shop吓ping，咁先算係一個完整嘅旅行團嘛！不過都係嗰句啦，我哋對shopping嘅興趣真係唔大，所以今日應該可以hea住玩。
既然最後一日，就梗係諗住早啲起身，玩盡佢，搭車入神戶機場行個圈啦……點知可能尋晚太攰，今朝瞓晏咗去唔到，唯有由酒店餐廳遠距離望吓先啦，下次再去過……！
﹝這麼近、那麼遠嘅神戶機場﹞
雖然去唔到神戶機場，但係都總算喺酒店附近行咗一陣條『散策路』，我哋穿過五號步道橋就會到達南公園，但係呢個南公園就真係冇乜嘢好睇，最得意都係無端端個大螺旋槳水池 -- 即係一個大水池，裡面放住個1：1 嘅螺旋槳，其實都唔知佢乜解救！不過冇所謂啦，至在行吓唧……
﹝南公園﹞
返酒店食完早餐，就要執齊行李離開lu；為咗紀念呢間曾經陪伴我哋三日兩夜嘅酒店，臨走前，都係要喺個門口影張無聊相先~~
﹝神戶博﹞
離開咗酒店，我哋第一站要去嘅就係日本品牌珠寶店 -- 田崎珍珠，好多年前去過東京嗰間，記憶中喺呢度係好似要『被軟禁』好耐嘅，而且啲首飾又超貴，總之印象唔係咁好啦；不過今次又覺得ok喎，逗留嘅時間唔耐，講解嗰位中國同胞都幾搞笑，佢話佢手上嗰隻蚌已經死咗好多次喎，唔係啩~~ 而且個舖頭大門仲係開住嘅，方便冇興趣嘅團友去休息室坐吓，又或者喺附近行吓，因為週圍嘅環境都唔錯呢~~
﹝神戶田崎珍珠﹞
睇完珍珠，我哋就真係要離開神戶lu~~ 點知竟然遇著大塞車，塞吓塞吓，發現原來大多數團友都已經瞓晒，我同老公都好似被感染到有啲睡意，結果影埋呢兩張相，同神戶say 個 bye，跟住就要眠一眠先喇~~
﹝Bye-bye神戶﹞
瞓醒就已經嚟到大阪lu~~﹝或者呢啲就係跟團嘅好處；當唔想費神嘅時候，將個軀體交比領隊就可以，佢會帶你到達目的地，唔使驚住搭錯車……﹞落咗車之後，我哋懷住惺忪嘅睡眼、拖住仍未回魂嘅軀體，隨隨移向心齋橋~~ 朋友好似話有地方要去，而我哋又有嘢要去搵，結果就決定同朋友分道揚鑣，晏晝先集合一齊去食拉麵。
﹝未瞓醒樣@心齋橋﹞
可能當時真係仲未瞓醒，我好似完全唔記得心齋橋究竟有乜嘢好睇咁，只係印象中行過吓間大丸，喺佢天台上面個空中花園hea咗陣，再行咗落supermarket 嗰層買咗包粟米湯，跟住就行返去道頓堀會合朋友，回程時喺心齋橋條橋上面見到有人玩蜥蝪，好恐怖呀~~
﹝印象模糊嘅心齋橋﹞
好快就嚟到我哋食午餐嘅地方lu……至於點解要嚟呢度食拉麵呢？只係因為老公個阿哥極力推介，就係咁簡單！hehe~~
不過其實道頓堀都有好多拉麵店，領隊都介紹咗一間，好似話多啲唔同口味可供選擇，而我哋幫襯呢間雖然選擇唔多，但係就勝在老自號，有口卑；自助形式買咗食劵就攞比廚房，等佢整好就坐低食，都係好簡單……不得不提就係呢間始終都係老舖，全部坐位都係『和式』，要屈住隻腳嚟坐，其實都幾辛苦……
﹝金龍拉麵﹞
順帶一題，金龍對面有個自動售賣機，有種110円嘅白色罐裝飲品、罐上印有『大阪限定』嘅字樣，印象中都幾好飲，即使唔飲，都可以買嚟做手信嘛，話晒都係『大阪限定』！哈哈！食完呢餐自費午餐後，我哋就喺道頓堀週圍行吓、影吓相……等『落隔』；點解要等『落隔』呢？因為……
﹝道頓堀﹞
……要繼續開餐囉！
首先就係嚟到大阪，必定要食嘅：大阪章魚丸，熱辣辣加上外脆內軟、章魚爽口又唔『痴』牙，正！之後再嚟炭燒蟹腳，不過就冇想像中咁好食，可能下次都係要入去坐定定食餐『蟹宴』會比較好啲~~
﹝餐後『小吃』﹞
行返轉頭準備去集合途中，竟然遇到剛才燒大阪章魚丸嗰個哥哥仔，咁有緣，就梗係要影返張相先啦！
﹝章魚丸『大王』﹞
集合後，我哋就隨住大隊行過日本橋，登上陪伴咗我哋5日嘅旅遊巴，正式踏上離開關西前往機場嘅最後一段路程；不過就喺上緊旅遊巴嘅時候，忽然個天陰晒，仲開始雨粉粉……可能日本都唔係太捨得我哋離開啦，哈哈！
﹝日本橋﹞
差不多去到機場時，竟然落起大雨，真係超級感恩……感恩嘅唔係因為我好想佢落雨，而係成個行程差不多日日都好天，只係喺離開時先有雨；否則要成日攞住把遮，就麻煩多喇！感謝主！
﹝充滿感恩嘅落雨天﹞
嚟到呢度，都係時候同日本講聲『再見！』，雖然我哋都好唔捨得，但係呢個離別只係暫時性嘅唧，因為……『我哋一定會再返嚟嘛！哈哈哈！』
﹝滿載而歸@大阪機場﹞
原來不知不覺，我哋都買咗唔少嘢返嚟，唔知大家收到我哋嘅手信開唔開心呢？其實呢啲多數都係平嘢，記念性質遠高於價值，如果唔係我哋就肯定破產lu~~
﹝戰利品﹞
~~ 完 ~~
留言列表
