松此放眼看世界

﹝2011年09月14日﹞

紀州南部皇都露天溫泉酒店 > 紅葉溪庭園@和歌山城 > 黑潮市場 > 有馬玩具博物館 

又一個和歌山早晨嘞……可能尋晚真係有啲攰，今朝晏咗起身，只係喺酒店樓下行咗一陣，不過雖然係一陣，我哋都有啲 target 嘅﹝香港人嘛~~﹞，就係要去影返酒店門口個舊郵筒，同埋去停車場另一邊，望吓個大風車﹝風力發電機﹞……哈哈，竟然無意中比我哋發現到個冇水嘅免費足湯 tim，話得冇水，就即係免費都冇用啦，唯有坐喺度，扮晒嘢，影張相就算啦！ 

﹝和歌山早晨！﹞ 

﹝2011年09月13日﹞

串本海中公園 > 梅干館 > 紀州南部皇都露天溫泉酒店

今日晏晝係喺串本海中公園飯堂度食火鍋，我哋食飽後就携『劵』入場參觀喇！

一入門口，就有個哥哥仔示意可以幫我哋影相，同其他樂園一樣，買佢張相就當然係要收錢嗰種啦，不過佢好好人，除咗用佢部收錢相機幫我哋影相之外，仲叫我哋放晒啲相機落個籃仔度，佢會遂架同我哋再影喎，而且仲放咗好多『海洋生物』喺度，任我哋攞去影相tim~~ ﹝老實講，佢咁好服務，邊會有人買佢啲相吖！不過為咗鼓勵佢嘅熱誠，結果我哋都買咗一張，多謝1,000円……﹞

大家認真啲睇吓下面張相，就會發現一個關乎魚類命運嘅驚世預言揭露於最左手邊嗰個朋友手中…… 仲未睇到？

﹝串本海中公園入口處﹞

﹝2011年09月13日﹞

白浜梅樽溫泉 > 千疊敷 > 三段壁 > 橋杭岩

『餓蝦唷~~ 』，和歌山早晨！嚟得旅行，通常我哋都會比 morning call時間早一啲起身，出去附近行吓、影吓相，然後先返酒店食早餐；今次都唔例外，一起身拉開窗簾，即刻『嘩』一聲，原來外面係無敵大海景喎，唔怪之得噚晚望出去會係漆黑一遍啦~~ 成大個海就係得幾個小島同懸崖點綴吓咁，好在有個海中展望塔喺度，如果唔係仲以為流落荒島tim~~ 我哋原本都想去個塔度行吓，點知佢一來未開門，二來呢度即使係住客都要收入場費，仲要800円一個人，好似唔多值得喎，結果我哋都冇去到……不過好在冇去唧，原來晏啲行程都會帶我哋去另一個海中展望塔，如果比咗錢入去就笨喇！

﹝無敵大海景@酒店房間﹞

﹝2011年09月12日﹞

香港 > 大阪關西空港 > Rukin Outlet > 白浜梅樽溫泉

話咁快就到咗出發嘅日子lu，今次係我哋第三次喺中秋節假期去旅行，心情一樣『緊張~~ 緊張~~ 』……

一大清早約埋兩個朋友喺中環機鐵站集合一齊出機場，雖然早咗少少到，但係個領隊就已經棟咗喺度等緊﹝離遠睇，佢個樣勁似王喜~~﹞；寄完行李，我哋就去咗 Popeye 度食早餐，一面食就一面同兩個朋友講解個行程嘅安排……依家先講行程係咪好似遲咗啲呢？有睇前傳嘅朋友就應該知道我哋連既定嘅行程都係喺出發前幾日先 confirm到，何況仲要加插行程以外嘅『驚喜』呢！

都未傾完就已經夠鐘入閘 lu，照舊影咗幾張閘前照就去準備上飛機，不過有樣好有趣嘅事想講一講；今次同行嘅其中一個朋友唔知點解好經常要去厠所，食早餐要去一去，臨上機又話要去，起初以為佢對去旅行有啲緊張，所以成日都想去，但係又唔係幾好意思直接問佢，點知後來同佢傾計講起，佢竟然話係因為生得矮，可能啲腸短啲，所以會去厠所密啲喎……呢樣嘢我都係第一次聽！係咪真o架？

﹝例牌閘前照﹞

今次呢個關西の旅，由於有兩個好想去日本，又好難先放到假嘅朋友同我哋一齊去，所以早喺幾個月前我哋就已經開始著手計劃，同去旅行社攞資料……不過可能實在太早，大多數旅行社都仲未有單張，唯有新X旅行社出咗個大阪、和歌山5天超值團，指定出發日期又完全乎合朋友嘅假期，而且比其他話天天出發嘅團種平成2,000蚊，仲連住2晚大阪市區5*酒店，不過最重要都係個團有一日自由活動時間，可以比我哋plan吓行程以外嘅『驚喜』，對於我哋嚟講，簡直係Perfect！ 

都係啦，由於早成2個月報名，個團都未confirm，不過，經過個旅行社職員講完個團點樣抵玩之後，我哋就覺得佢冇乜可能會唔成團喎……於是同嗰兩個朋友商量完後就走去報名，而個團嗰一日自由活動時間嘅行程就隨即開始『草擬』嘞﹝話到尾都有兩個朋友一齊去，雖然佢哋冇乜所謂，但係點都應該比一、兩個選擇人哋揀吓嘅~~﹞。睇吓睇吓，見人哋啲Blog話可以由大阪坐巴士落四國睇旋渦，我哋又想去，見到嵐山、嵯峨野好靚，我哋又想去，諗諗吓，覺得嗰兩個朋友可能都想去Universal Studio同大阪城影吓相喎，於是乎plan plan吓就變咗4個option嘅自動旅程﹝下圖﹞嘞……

﹝2013年8月25日﹞

如果大家有留意個日期，就會知道我呢個西歐篇拖咗好耐，2011年3月去嘅旅行，要到2013年8月先打完，歷時2年5個月，當中都去咗幾次旅行，換句說話講，仲有好幾次嘅行程『未上架』，唉~~

Anyway，要做嘅嘢始終要做，未完成嘅嘢係要去完成嘅，所以呢個後記都係要完成嘅！

事隔咁耐，仲有咩好記呢？當然有啦！今次西歐之旅，對於我嚟講，係打破咗我一d童年嘅觀念，同埋開咗我嘅眼界，仲可以同老婆一齊經歷一d特別事，例如：

1) 歐洲，係一個我去唔到嘅地方
2) 大笨鐘一d都唔『笨』，笨嘅只係我自己
3) 由London Eye睇黃昏日落係好靚嘅
4) 梵蒂岡嘅聖彼得大教堂真係好宏偉
5) 原來比薩斜塔係咁細座
6) 喺威尼斯跌爛相機，好彩，仲影到相！
7) 米蘭出名嘅唔係教堂，而係白鴿黨
8) 喺鐵力士山踏上人生最高之顛
9) 德國咸豬手真係好巨型
10) 『印堂發黑』係一個最貼切嘅形容詞去形容科隆大教堂
11) 華倫丹係一個令我好驚喜嘅地方
12) 喺風車村見到巨型大木屐
13) 喺布魯日遇見一個好親切嘅修路工人
14) 布魯塞爾玩香蕉眼羊
15) 親眼見到巴黎鐵塔
16) 巴黎市自由行，搵皇宮 & 行羅浮宮

咁多日以來，真係好感恩，有一個好好嘅領隊，有一班好玩得埋嘅團友，剛好5對Couple，有好嘅天氣，大家一路平安……衷心感謝主。

﹝2011年3月17日﹞

﹝繼續巴黎市內觀光x2，之後就返香港﹞

今日嘅行程極簡單，起身食早餐，攞埋行李跟車出老佛爺，之後就係自由時間同埋自費食lunch，最後返老佛爺集合出機場返香港。

今日開始行程之先，等我講樣痴線嘅嘢比你知吖，呢個法國之旅有兩個半日嘅自由時間，原本我哋係想尋日嘅半日去行羅浮宮，而今日呢半日就去行凡爾賽宮o架！但係我個朋友同我講，兩個宮都好大好多嘢睇，而且凡爾賽宮喺好遠，搭得車去就已經要番轉頭，所以我哋先『取消』凡爾賽宮嘅行程吧~~夠顛吧！！

今日有幾個任務要完成：

1) 搵『羅浮宮三寶』

2) 搵達文西嘅倒轉玻璃金字塔

3) 搵Angelina買朱古力醬

4) 去國虎屋食lunch

可惜，成功率只有50%，點解？睇落去就知道…

尋日同今日都係由老佛爺行去羅浮宮，不過出發之前我哋會先去春天百貨買macarons做手信，當我哋去到嘅時候，呢間舖頭剛開門，諗住快快趣趣買完快d走，唔知係個法國妹未瞓醒，還是佢天生手腳慢呢？抑或係我哋買得太多呢？買一打macarons，講埋比佢聽要邊幾種味道，一夾一放重覆12次再包好，好簡單吧，咁都要搞咗我哋差不多成半個鐘，完成欽佩佢嘅工作 & 服務效率呀！

﹝Macarons Menu﹞

﹝2011年3月16日﹞

﹝繼續巴黎市內觀光﹞

食飽飯之後，就去暢遊塞納河，大約玩一個鐘頭左右啦，沿途可以欣賞兩岸嘅景色，佢會去到聖母院附近，仲可以睇到巴黎鐵塔tim~~去到碼頭嘅時候，見到佢個入口好似有d單張比人攞，諗佳睇吓咩單張啦，點知領隊趕我哋上船，想睇一陣都唔得，結果，只有聽話上船lor~~

呢架船好大隻，可以同時坐幾百人，由於天氣好嘅關係，全部人都坐上層，而坐得上層嘅人，個個都坐唔定，呢度又影嗰度又影，唔理背景係乜都好，總之乜都要影一餐，真係『啤』一聲~~

﹝遊船河中嘅聖母院及巴黎鐵塔﹞

﹝2011年3月16日﹞

﹝巴黎市內觀光﹞

﹝讓各位久侯嘞，我終於『的』起心肝再寫埋餘下兩日嘅行程，相隔咁耐都仲唔放棄，真係唔like自己都唔得！﹞

去到呢一日，已經係成個行程嘅最後一站 -- 巴黎，今日就只係喺市中心四圍行，無乜特別。我哋會先上巴黎鐵塔，又稱艾菲爾鐵塔，之後就去拿破崙墓、協和廣場同埋凱旋門，參觀完之後就去食飯；飯後就去塞納河遊船河，之後就有幾個鐘嘅時間去老佛爺Shopping，我哋就當然唔會喺呢個已被淪陷嘅地方久留，我哋選擇探路去羅浮宮門口一帶，預備聽日同埋D團友一齊去，之後就番老佛爺會合，會合之後就去食飯，全日行程就係咁！OK，Let's go~~

一如以往，又係早少少起身，不過今次呢間酒店附近無嘢好行，我哋就早d去食早餐lor~~ 食完早早餐就出發去巴黎鐵塔，唔…今日天氣普通。

﹝巴黎鐵塔附近﹞

﹝2011年3月15日﹞

﹝布魯日 > 布魯塞爾 > 巴黎﹞

嘆完青口餐後，又係時候同比利時say goodbye，跟住就會進入法國，亦即係我哋嘅行程最後一站，而今日下午嘅行程就係去蒙馬特山，我稱佢為賊仔山，因為呢一度有好多或明或暗嘅賊仔，一不留神，破財擋災吧，詳情陣間再講~~

進入法國之後，我見到一d廣告牌都幾得意，大家一睇個公仔就知道佢賣乜。

﹝玩小型賽車吧~~﹞